होटल उद्घाटनमा प्रधानमन्त्रीको विशेष रुचि, ऊर्जामन्त्री पाँच तारेको मालिक

देश प्राकृतिक विपत्तिसँग जुधिरहँदा खासै बाहिर ननिस्कनुभएका प्रधानमन्त्री केपी शर्मा ओली आज एकाएक होटल उद्घाटनमा देखिनुभएको छ । बाढीपहिरो प्रभावित क्षेत्रको स्थलगत अवलोकनमा निस्कनसमेत जाँगर नचलाएको आरोप लागिरहेका बेला उहाँ आफ्नै क्याबिनेट मन्त्रीको लगानीमा खुलेको पाँचतारे होटल शुभारम्भ गर्न पुग्नुभएको छ ।     

बूढानीलकण्ठ नगरपालिका–१, मुहानपोखरीस्थित पाँचतारे होटल ‘होलिडे इन’ को आज एक भव्य समारोहबीच प्रधानमन्त्री र नेपाली काँग्रेस सभापति शेरबहादुर देउवाले संयुक्त रुपमा उद्घाटन गर्नुभएको छ । उक्त होटलका मुख्य मालिक ऊर्जा, जलस्रोत तथा सिँचाईमन्त्री दीपक खड्का हुन् । 

नेपाली काँग्रेसका पूर्वमहामन्त्री तथा सांसद सशांक कोइरालाको कोटाबाट मन्त्री बनेका संखुवासभाका खड्का आफैँमा विवादित पात्र हुन् । जलविद्युतमा ठूलो लगानी गरेका उनीमाथि बैंकको अर्बौं ऋण नतिरेको आरोप लाग्दै आएको छ । करोडौँ मूल्यको लैनचौरिस्थित नेपाल स्काउटको जग्गा र भवन भाडामा अनियमितता गरेको अभियोगसँगै चेक बाउन्सको मुद्दा पनि यथावत छ । 

नेपाली काँग्रेसभित्रको समीकरण मिलाउने नाममा आरोपको भारी बोकेरै मन्त्री बन्न सफल भएका खड्का प्रधानमन्त्रीको हातबाट रिबन काटेर होटल उद्घाटन गराउन सफल भएका हुन् । प्रधानमन्त्रीमा नियुक्त जम्मा तीन महिनाको अवधिमा प्रधानमन्त्री ओलीले गरेको यो तेस्रो पाँचतारे होटल उद्घाटन हो । 

यसअघि पनि उहाँले यस्तै विवादित व्यक्तिको लगानीमा खुलेका दुइ वटा होटल आफ्नै हातले उद्घाटन गरिसक्नुभएको छ । भदौ २९ गते प्रधानमन्त्री ओलीले बूढानीलकण्ठस्थित होटल लेमन ट्रि प्रिमियरको शुभारम्भ गर्नुभएको थियो । 

उक्त होटलका मुख्य सञ्चालकहरुमा बाबुकाजी कार्की ,डा. राजेन्द्र केसी, अम्बिका पौडेल,हरिप्रसाद पाठक, नवराज बुर्लाकोटी,दीपक पाण्डे, जनक भट्ट,दिपेन्द्र श्रेष्ठ र जलेश्वर पाण्डे छन् । उनीहरुमध्ये केही सेयर बजारका नामूद खेलाडी हुन् । 

यसअघि प्रधानमन्त्री नियुक्त भएको केही दिनमै ओलीले नक्सालस्थित होटल हिल्टनको उद्घाटन गर्नुभएको थियो । कोरोना महामारीमा ‘थर्मल गन’ काण्ड मच्चाएका र विभिन्न विवादमा मुछिएका शंकर ग्रुपका साहिल अग्रवाल सो होटलका मालिक हुन् । 

विद्युत प्राधिकरणको डेडिकेटेड ट्रंक लाइन महशुल भुक्तानी विवादमा शंकर ग्रुपलाई पर्दा पछाडिको खेलाडी मानिन्छ । गत साउन दोस्रो साता भएको होटल उद्घाटनमा प्रधानमन्त्रीसँगै उपप्रधान तथा अर्थमन्त्री विष्णु पौडेल, गृहमन्त्री रमेश लेखक,राष्ट्र बैंकका गभर्नर महाप्रसाद अधिकारीलगायत उच्च पदस्थ अधिकारीहरुको लाइन लागेको थियो ।