जग्गादाताको नाम समेटिएको पुस्तक सार्वजनिक गर्दै गृहमन्त्रीद्वारा प्रहरीको प्रशंसा

नेपाल प्रहरीलाई निःशुल्क जग्गा दिने दाताहरुको नामावली तथा प्रहरीसँग सम्बन्धित अक्षकोषको विवरण समेटिएको पुस्तक सार्वजनिक गरिएको छ ।

६९ औं प्रहरी दिवसको अवसरमा आज नक्सालस्थित प्रहरी हेडक्वाटरमा आयोजित एक समारोहबीच गृहमन्त्री रमेश लेखकले पुस्तिका लोकार्पण गर्नुभएको हो । सो अवसरमा उहाँले मुलुकको अपरिहार्य र महत्त्वपूर्ण संस्थाको रुपमा प्रहरी संगठन स्थापित भएको बताउनुभयो । 

राज्य र नागरिकबीचको पहिलो सम्पर्क सूत्रको रुपमा प्रहरी संगठन रहेको उल्लेख गर्दै गृहमन्त्रीले आन्तरिक शान्ति सुरक्षा, कानून कार्यान्वयन, मानव अधिकार संरक्षण, अपराध नियन्त्रण, अनुसन्धान, विपत्ति र प्रकोपमा खोज तथा उद्धार, सवारी व्यवस्थापनदेखि अन्तर्राष्ट्रियस्तरमा नेपाल प्रहरीले गरेको भूमिकाको प्रशंसा गर्नुभयो । 

राज्यको तर्फबाट नागरिकसमक्ष सबैभन्दा पहिले पुग्ने संवाहक शक्तिका रुपमा प्रहरीको पहिचान बनेको जनाउँदै उहाँले भन्नुभयो, ‘अन्यायमा परेका जोकोहीलाई न्याय दिलाउने र कसुरदारलाई दण्ड दिने राज्यको पहिलो प्रतिनिधि प्रहरी हो । मानव अधिकारको संरक्षक र पालक पनि हो । यति धेरै जिम्मेवारी र दायित्व सायद अरु कुनै संगठनमा छैन ।’

जुनसुकै कठिन घडीमा पनि निष्ठावान रही कर्तव्यपराण रहने प्रहरीको मौलिक चरित्र रहेको गृहमन्त्री लेखकले बताउनुभयो । उहाँले समाजको विकास र परिवर्तनसँगै प्रहरी संगठन पनि गतिशील हुन आवश्यक रहेको र प्रहरीको व्यवसायिकता र सेवाको क्षेत्रलाई तदनुरुप नै विकास गर्दै लैजानुपर्नेमा जोड दिनुभयो । 

साथै, महिला तथा बालबालिकाउपर हुने हिंसा, कसुरजन्य कार्य, भेदभाव, छुवाछुतलगायत कुनै पनि अपराधिक कर्म र सञ्जालप्रति सजग रहन र पूर्वाग्रह र मलैजा नगरी शून्य सहनशीलताको नीतिअनुरुप कानूनको दायरामा ल्याउन पनि सम्पूर्ण प्रहरी कर्मचारीलाई निर्देश गर्नुभयो । 

प्रहरी दिवसको अवस्थामा गृहमन्त्री लेखकले हेर्डक्वाटरस्थित अमर प्रहरी स्मारकमा पुष्पहार अर्पण गर्नुका साथै वीरगति प्राप्त प्रहरीका आश्रित परिवारलाई कदरपत्र पनि प्रदान गर्नुभएको छ ।