बिदेशीलाई ठगेर जेल बस्नेको मुद्दामा अर्को वर्ष पेशी

बैकिङ्ग कसूरमा लामो समयदेखि थुनामा रहेका लमजुङ्ग निवासी गमबहादुर लामिछानेद्वारा दायर पुनरावेदन मुद्दाको पेशी स्थगित भएको छ । सर्वोच्च अदालतका न्यायाधीशद्वय महेश शर्मा पौडेल र नित्यानन्द पाण्डेयको इजलासमा पेशी चढेको मुद्दा पुनरावेदकको कानुन व्यवसायीबाट स्थगित गरिएको हो । 

खुमबहादुर थापासमेतलाई विपक्षी बनाएर दायर मुद्दाको दर्ता नम्बर ०७९–आरबी–०१९६ रहेको छ । उक्त मुद्दाको अर्को पेशी २०८२ जेठ ५ गतेलाई तोकिएको छ । अस्ट्रेलिया बस्ने डलर अर्बपति शेष घलेका नक्कली भाइको परिचयमा दुनियाँलाई ठगिरहेका लामिछाने पटकपटक थुनामा परेका व्यक्ति हुन् । 

विभिन्न काण्डमा मुछिएका उनले व्यक्तिहरुबाट पैसा लिएर रित्तो बैंक खाताको चेक भिडाउँदै आएका थिए ।  उनीमाथि चिनियाँ व्यापारीहरुलाई ठगी घर र कम्पनी हत्याएकोमा चितवन र काठमाण्डौ जिल्लासहित उच्च अदालतको हेटौंडा र पाटन इजलासबाट दोषी ठहर गरिएको  थियो ।