सरकारी योजना बेचेर श्रीमतीको खातामा पैसा राखेको आरोप लागेका सांसद पक्राउ
जनता समाजवादी पार्टीका मधेश प्रदेश सभा सदस्य सरोजकुमार सिंह पक्राउ परेका छन् । अख्तियार दुरुपयोग अनुसन्धान आयोगले उनलाई आज काठमाडौँको अनामनगरबाट नियन्त्रणमा लिएको हो ।
महोत्तरी क्षेत्र नम्बर–४ (ख) बाट निर्वाचित सिंहमाथि योजना बिक्री गरेको आरोप छ । अख्तियारका अनुसार उनले विभिन्न आयोजनामा आफूअनुकूल उपभोक्ता समिति गठन गरेर सांसद विकास कोषको रकम श्रीमती र स्वकीय सचिव विनोदकुमार कायस्थको खातामा राखेको पाइएको छ ।
अख्तियारको टोलीले गत जेठ १३ गते उनको घरमा छापा हानेर स्वकीय सचिव कायस्थलाई पक्राउ गर्नुका साथै सिंहको मोबाइल जफत गरेको थियो । पक्राउ परेका सिंहमाथि अख्तियारले थप अनुसन्धान गर्नेछ ।
टिप्पणीहरू