मीटरब्याजीलाई कारबाही गर्न ऐन संशोधनका लागि सरकारले संसदमा दर्ता गरेको विधेयक पारित नभएपछि मीटरब्याज पीडितहरु पुनः आन्दोलनमा उत्रिएका छन् ।
मीटरब्याज पीडितको न्यायका लागि भन्दै सरकारले ल्याएको विधेयक प्रमुख प्रतिपक्षी दल एमाले, राष्ट्रिय स्वतन्त्र पार्टी र राप्रपाले गरेको सदन अवरुद्धका कारण निस्क्रिय भएपछि आजदेखि पीडितहरु आन्दोलनमा उत्रिएका हुन् ।
संसद घेराउ कार्यक्रमअन्तर्गत मीटरब्याजविरूद्ध संघर्ष समिति नेपालका अध्यक्ष मनोज पासवानको नेतृत्वमा करिब दुई सय जनाको उपस्थितिमा ब्यानर र प्लेकार्डसहित प्रदर्शन गर्दै माइतीघरबाट निस्केको जुलुस संसद भवन नजिकै पुगेर कोणसभामा परिणत भएको थियो । माइतीघर मण्डलादेखि नयाँ बानेश्वरसम्म मार्चपास गरेका उनीहरुले सोक्रममा आफूहरुसँग गरेको सहमति कार्यान्वयन गर्न सरकार र राजनीतिक दलहरुको ध्यानाकर्षण गराए ।
त्यसक्रममा प्रदर्शनकारीहरुले सरकार र राजनीतिक दलविरुद्ध चर्को नाराबाजीसमेत गरे । उनीहरुले ‘संविधानमा उल्लेख समाजवाद उन्मुख अर्थनीति निर्माण गर’, ‘मीटरब्याज पीडितलाई न्याय दे’, ‘सुदखोर पीडक मूर्दावाद’, ‘मीटरब्याजविरुद्ध हाम्रो आन्दोलन जारी छ’, ‘सामन्तीका मतियार मूर्दावाद’, ‘एमाले, रास्वपा, राप्रपा मूर्दावाद ! मूर्दावाद !’ जस्ता नारा लगाएका थिए ।
गत २० वैशाखमा सरकारले ल्याएको मुलुकी संहितासम्बन्धी केही नेपाल ऐनलाई संशोधन गर्ने अध्यादेश २०८० को प्रतिस्थापन विधेयक संविधानअनुसार ६० दिनभित्र संसदबाट पारित गर्नुपर्ने हुन्थ्यो । तर, निर्णयार्थ प्रस्तुत गर्ने दिन प्रधानमन्त्रीको राजीनामा मागेर एमालेसहितका प्रतिपक्षी दलले सदन अवरुद्ध गरेका कारण पारित हुन नसक्दा सो विधेयक निस्क्रिय भएको हो ।
