काठमाडौंको बालाजुस्थित पूजाकोठी पेट्रोल पम्पमा कार्यरत कर्मचारीहरुलाई कुटपिट गरी ज्यान मार्ने धम्की दिइएको छ । उक्त आरोपमा प्रहरीले तीन जनालाई पक्राउ गरेको छ ।
महानगरीय प्रहरी प्रभाग, नयाँ बसपार्कद्वारा खटिएको टोलीले बा. १ ज ८६३२ नम्बरका ट्याक्सी चालकसहित तीन जनालाई पक्रेको बताइएको छ ।
गत भदौ ३० गते मध्यरातमा पेट्रोल हाल्न बा. १ ज ८६३२ र बा. १ ज ५४१५ नम्बरको ट्याक्सीमा पुगेका अज्ञात समूहले पम्पमा कार्यरत कर्मचारी दिपेन्द्र रिमाल र बद्री खत्रीमाथि आक्रमण गरेका थिए ।
साथै, समूहले ज्यान मार्ने र पेट्रोल पम्पमा आगजनी गर्ने धम्की दिएको उनीहरुको भनाई छ । उक्त घटनालगत्तै पम्पका सञ्चालकले महानगरीय प्रहरी प्रभाग, नयाँ बसपार्कमा खबर गरेका थिए ।
तर, तीमाथि कुनै कारबाही नभएपछि अखिल नेपाल पेट्रोलियम मजदुर संघले दोषीलाई कारबाहीको माग गर्दै निवेदन हालेको छ । सो घटनामा संलग्न एक ट्याक्सी चालकसहित तीन जनालाई आज पक्राउ गरिएको प्रहरीले जनाएको छ । प्रहरीले म्याद थप गरी सार्वजनिक मुद्दा लगाउने तयारी गरेको छ ।
