सिरोहिया समातिँदा लोकतन्त्र धरापमा नपर्ने केपी ओलीको ठहर

एमाले अध्यक्ष केपी शर्मा ओलीले कान्तिपुर मिडिया ग्रुपका अध्यक्ष कैलाश सिरोहिया पक्राउ पर्दैमा लोकतन्त्र खतरामा नपर्ने टिप्पणी गर्नुभएको छ । 

सरकारले सिरोहियालाई समाचारका सन्दर्भमा नभई उनीमाथि लागेको फौजदारी आरोप छानविन गर्न पक्राउ गरेकाले यसलाई सञ्चारको हक खोसेको अर्थमा व्याख्या गर्न नहुने ओलीको तर्क छ । गृहजिल्ला झापामा आयोजित एक कार्यक्रममा बोल्दै उहाँले यो घटनाले लोकतन्त्र नै धरापमा परेको हो ? भन्दै प्रश्नसमेत गर्नुभयो 

'टाइमिङ ठीक भयो कि भएन, त्यो बेग्लै कुरा होला, तर डमोक्रेसी नै खतरामा परिहाल्यो त ? के सञ्चारका हकहरू खोसिएकै हुन् त ?', ओलीले भन्नुभयो, 'यस्तो गलत व्याख्या उपयुक्त हुँदैन । जे यथार्थ हो, त्यही गर्नु राम्रो हो ।'

मिडिया सञ्चालकमाथि लागेको फौजदारी आरोप छानविन गर्नुलाई सञ्चार मध्यममाथि हमला भनिएको भन्दै उहाँले असन्तुष्टि जनाउनुभयो । 'कुनै सञ्चारमाथि हमला भनेर, पत्रकारमाथि फौजदारी अभियोग छ, मिडिया हाउसको प्रमुखमाथि बेग्लै मुद्दा छ, किन यो समाचार प्रकाशित गरेको, किन यो बोल्यो भन्ने विषय होइन, विषय अर्कै छ ', ओली भन्नुहुन्छ ।