पञ्चकोट महायज्ञको हिसाब गोलमाल, धर्मका नाममा व्यक्ति मोटाएको भन्दै छानविन माग

बागलुङको सर्वसिद्धिधाम पञ्चकोटमा लगाइएको ब्राह्मण्डीय महायज्ञमा उठेको रकम घोटाला भएको भन्दै स्थानीयले विरोध जनाएका छन् । आयोजकले महायज्ञको हिसाबकिताब सार्वजनिक गरेलगत्तै स्थानीय आक्रोशित भएका हुन् ।  

आयोजकले केही दिनअघि भेला बोलाएर आम्दानी र खर्च विवरण सार्वजनिक गरेका थिए । जसअनुसार १० दिन महायज्ञ गर्दा १२ करोड १५ लाख ५५ हजार ९७४ संकलन भएको र चार करोड २२ लाख ५७ हजार ४८१ रुपैयाँ खर्च भएको हिसाब देखाइएको छ । बागलुङपछि राजधानी केन्द्रीत कार्यक्रम गर्दा लाखौं रुपैयाँ खर्च भएको पनि अमूर्त हिसाब जनाइएको छ । 

अर्कोतिर, एक करोड ७७ लाख ६६ हजार २४० रुपैयाँमा धान बिक्री गरेको उल्लेख छ । तर, आम्दानीमा भने धान बिक्रीबापत एक करोड २० लाख रुपैयाँ मात्र लेखिएको छ । बाँकी ५७ लाख ६६ हजार २४० रुपैयाँको हिसाब गोलमाल देखिन्छ । पछि फिर्ता गर्ने शर्तमा तराईबाट ल्याइएको धानसमेत बेचेर अपारदर्शी हिसाब देखाइएकाले आयोजकले ठूलो घोटाला गरेको स्थानीयको आशंका छ । 

श्रीकृष्णागण्डकी, शालग्राम र समग्र मुक्ति क्षेत्रको महिमालाई लोकोत्त गर्ने, गोवंशको संरक्षण गर्ने र गर्न प्रेरणा प्रदान गर्ने, पञ्चकोटमा जलसम्पदा संरक्षणको प्रतीकस्वरूप निर्माणाधीन विश्वशान्ति गण्डकी कलशको निर्माणलाई पूर्णता दिने, नैतिक, शिष्ट, समुन्नत र सचरित्रवान् समाजको पुनर्जागरण गर्ने र यज्ञमा शेष रहेको रकम सर्वसिद्धिधाम पञ्चकोटको सर्वाङ्गीण विकासमा प्रयोग गर्ने उद्देश्यसहित गत फागुनमा महायज्ञको आयोजना गरिएको थियो । 

आयोजकले निकै तामझामका साथ भिआइपीहरुलाई उपस्थित गराएर महायज्ञको उद्धघाटन गराएका थिए । महायज्ञमा राष्ट्रपति रामचन्द्र पौडेल, प्रधानमन्त्री पुष्पकमल दाहाल प्रचण्ड, एमालेका अध्यक्ष एवं पूर्वप्रधानमन्त्री केपी शर्मा ओली, पूर्वअर्थमन्त्री विष्णु पौडेल, गण्डकी प्रदेशका मुख्यमन्त्री सुरेन्द्र पाण्डेलगायतका उच्च पदस्थहरु सहभागी भएका थिए । 

यता, पञ्चकोटलाई धार्मिक पर्यटकीय केन्द्र बनाउने भन्दै शुरु गरिएको ‘विश्व शान्ति गण्डकी कलश’ निर्माण कार्य अहिले ठप्प छ । त्यसमा पनि ठूलै आर्थिक हिनामिना भएको स्थानीय बताउँछन् । धर्मको नाममा रकम उठाएर केही व्यक्ति मोटाएको दाबी गर्दै स्थानीयले सत्यतथ्य छानबिन गर्न माग गरेका छन् ।