गृहमन्त्रीविरुद्धको सहकारी ठगी मुद्दामा अन्तिम सुनुवाई अनिश्चित

गृहमन्त्री रवि लामिछानेविरुद्धको सहकारी बचत ठगी मुद्दामा सर्वोच्च अदालतमा हिजो पनि सुनुवाई नसकिएकोले हेर्दाहेर्दैमा राखिएकाले मुद्दाको अन्तिम सुनुवाई तय भएको छैन । 

न्यायाधीशद्वय सपना प्रधान मल्ल र सारङ्गा सुवेदीको इजलास नम्बर २ मा हिजो भएको सुनुवाई पनि नसकिएको हो । सहकारी ठगी प्रकरणमा गृहमन्त्री लामिछानेको संलग्नता रहेको जिकिरसहित उनलाई पदबाट निलम्बनको माग गर्दै अधिवक्ता अनुपम भट्टराईले जेठ १४ गते रिट दायर गरेका थिए । 

यो मुद्दा यसअघि कहिले हेर्न नमिल्ने, कहिले हेर्न नभ्याइनेमा परेको र दुई पटक सुनुवाई स्थगितसमेत भइसकेको छ । यसअघि असार ७ गते पनि हेर्दाहेर्दैमा राखिएको थियो । ११  दिनपछि हिजो सुनुवाई भएको हो ।

रिटमा कास्की,रुपन्देही र चितवनमा लामिछानेविरुद्ध सहकारी ठगीमा मुद्दा दायर नभएको उल्लेख गर्दै महान्यायाधिवक्ता कार्यालयले लेखेको पत्रको कानुनी वैधतामाथि पनि प्रश्न उठाइएको छ ।

उक्त पत्रले संविधान, फौजदारी कानुन र सहकारीका बचतकर्ताको न्यायप्राप्त गर्ने आधारलाई कमजोर बनाई प्रभावित गराउन सक्ने जिकीर गर्दै उक्त कार्य उत्प्रेषणको आदेशले बदर माग गरिएको छ ।