सहकारीका ऋणीले कर्जा पुर्नतालिकीकरण गर्न पाउने

गत वर्ष खराब ऋणीको सूचीमा नपरेका सहकारीका ऋणीले ५० प्रतिशत ब्याज भुक्तानी गरे तीन महिनाका लागि कर्जा पुर्नतालिकीकरण गर्न पाउने भएका छन् । 

सहकारी विभागद्धारा आज जारी छ बुँदे निर्देशनमा यसअघि यस्तो सुविधा नलिएका ऋणीले उक्त सुविधा पाउने उल्लेख छ । पाकेको ५० प्रतिशत ब्याज भुक्तानी गरेमा बाँकी साँवालाई तीन महिनाका लागि पुर्नतालिकीकरण गर्न सकिने विभागले प्रष्ट पारेको छ । 

‘परिस्थितिजन्य कारणले समस्यामा परी कर्जालाई नियमित गर्न नसकेका ऋणीहरुलाई कर्जा चुक्ता गर्न परेको कठिनाईलाई दृष्टिगत गरी ऋणी सदस्यहरुलाई परेको प्रभाव मूल्यांकन गरी सदस्यको माग, आवश्यकता र औचित्यता समेतको आधारमा गत वर्ष खराब ऋणीको सूचीमा नपरेका र यसअघि यस्तो सुविधा नलिएका ऋणीका लागि कर्जामा पाकेको ५० प्रतिशत ब्याज भुक्तानी गरेमा बाँकी साँवालाई तीन महिनाको अवधिका लागि पुर्नतालिकीकरण गर्न सकिने,’ विभागको निर्देशनमा भनिएको छ । 

पुर्नतालिकीकरणपश्चात् कर्जा नोक्सानी व्यवस्थाबाट ‘राइटब्याक’ हुने अवस्था आएमा र ‘राइटब्याक’ गरिए बराबरको रकम सञ्चित मुनाफा खाता खर्च गरी छुट्टै खातामा लेखाङ्कन गर्नुपर्ने पनि विभागले जनाएको छ । 

विभागले लेखाङ्कन गरिएको रकमबाट लाभांश तथा कर्मचारी बोनस वितरण नगर्न सहकारी संस्थालाई निर्देश गर्दै पुर्नतालिकीकरण गरेबापत ऋणीबाट कुनै पनि प्रकारको शुल्क तथा हर्जना नलिन समेत चेतावनी दिएको छ । 

त्यस्तै, पुर्नतालिकीकरण गरिएका कर्जाको किस्ता लगातार छ महिनासम्म नियमित भएपश्चात् त्यस्ता कर्जाको कर्जा नोक्सानी व्यवस्थाबाट ‘राइटब्याक’ गरिएको रकम मात्र छुट्याई सञ्चित मुनाफा खातामा लेखाङ्कन गर्नुपर्ने पनि विभागको निर्देशन छ । 

विभागले ऋण तथा बाँकी बक्यौता असुलीलाई थप प्रभावकारी बनाई आफ्ना सदस्यको बचत रकम समयमा फिर्ता गर्न समेत सहकारी संघसंस्थालाई आग्रह गरेको छ । 

साथै, ऋणीले आर्थिक वर्ष २०८०-०८१ को ब्याज आगामी साउन १५ गतेभित्र भुक्तानी गरेमा आवको आयको रुपमा गणना गर्न सकिने गर्न भनिएको छ । विभागले निर्देशनविपरीत कार्य गरेको पाइएमा कानूनबमोजिम कारबाही गरिने समेत चेतावनी दिएको छ ।