बस्तीमा चितुवा पसेपछि सतर्क रहन आग्रह

मकवानपुरको मकवानपुरगढी गाउँपालिका–३ को मोरंगे र वडा नम्बर–४ को कालीखोलालगायत अन्य स्थानमा चितुवा छिरेको छ । बाख्रा, गाईं, कुकुरजस्ता घरपालुवा जनावरहरु मृत र गम्भीर घाइते भएको भेटिएपछि खोजतलासका क्रममा चितुवाका पाइला फेला परेको हो । 

डिभिजन वन कार्यालय, मकवानपुरले सूचना जारी गर्दै बिहान–बेलुका एक्लै नहिँड्न आग्रह गरेको छ । कतै जानुपरेमा समूहमा जान कार्यालयले सूचित गराएको छ । ‘विगत केही दिनदेखि वन्यजन्तु चितुवा गाउँबस्तीमा प्रवेशगरी बाख्रा, गाईं, कुकुरजस्ता घरपालुवा जनावरहरुलाई मार्ने तथा गम्भीर घाइते बनाइरहेको पाइएको सन्दर्भमा उक्त क्षेत्रहरुमा चितुवाको मुभमेण्ट हुने गरेको आधिकारिक तथ्यसमेत फेला परेको हुँदा विशेषगरी बिहान–बेलुका एक्लै जंगल क्षेत्रमा हिँड्डुल नगर्नुहुन साथै जानैपर्ने अवस्था भएमा समूहमा सुरक्षित भएर मात्र हिँड्नहुन समेत जानकारी गराइएको छ’,सूचनामा उल्लेख छ ।

त्यसैगरी, कहीँकतै कुनै घटना भएको पाइएमा सुरक्षा निकाय, वडा कार्यालय, सब डिभिजन वन कार्यालय तथा डिभिजन वन कार्यालयमा सम्पर्क गर्न भनिएको छ ।