राष्ट्रपति रामचन्द्र पौडेलले फागुन २१ गते तोकिएको प्रतिनिधि सभाको निर्वाचन गराउन सरकारलाई दायाँबायाँ नगरी केन्द्रीत हुन निर्देशन दिनुभएको छ । आज शीतल निवासमा राष्ट्रिय सुरक्षा परिषदको वार्षिक प्रतिवेदन बुझ्दै उहाँले जसरी पनि फागुन २१ मै चुनाव गराउन निर्देशनात्मक सुझाव दिनुभएको हो ।
विभिन्न समूहले फागुन २१ गते तोकिएको निर्वाचन कुनै पनि हालतमा सम्भव नरहेको दावी गरिरहँदा त्यसलाई चिर्नेगरी काम गर्न राष्ट्रपति पौडेलको आग्रह छ । उहाँले निर्वाचनको एक महिना अघिदेखि नै सुरक्षा व्यवस्थापन गर्न राष्ट्रिय सुरक्षा परिषदलाई निर्देशन समेत दिनुभएको छ ।
तोकिएको मितिमा निर्वाचन हुन नसके मुलुकमा थप जटिलता सिर्जना हुने विश्लेषणसहित राष्ट्रपति पौडेलले निर्वाचनको तयारीमा कुनै कसर बाँकी नराख्न पनि आग्रह गर्नुभयो ।
