सर्वत्र जलमग्न हुँदा जुवाडे होटलमा तास फिट्न व्यस्त

बाँके र चितवनमा जुवातास खेलिरहेको अवस्थामा प्रहरीले १९ जनालाई खालबाटै पक्रेको छ ।

बाँकेको कोहलपुर नगरपालिका–११, न्यूरोडस्थित म्याक्स होटलमा जुवा खेलिरहेको अवस्थामा स्थानीय ३५ वर्षीय उपेन्द्र रानालगायत १२ जनालाई आज बिहान प्रहरीले पक्राउ गरेको छ ।

इलाका प्रहरी कार्यालय कोहलपुरबाट खटिएको टोलीले उनीहरुलाई दुई लाख ३१ हजार एक सय ८० रुपैयाँ र छ बुक ताससहित फेला पारेको हो । लगातारको वर्षापछि बाँकेका अधिकांश भूभाग जलमग्न छ । जुवाडेहरु पछिल्लो केही दिनदेखि होटलमा बसेर जुवातासमा व्यस्त भएका हुन् ।

उता चितवनको खैरहनी नगरपालिका–३ मा चिरञ्जिवी सडौलाको घरमा जुवा खेलिरहेको अवस्थामा घरबेटीलगायत सात जनालाई प्रहरीले आजै बिहान पक्राउ गरेको छ ।

इलाका प्रहरी कार्यालय, खैरहनीबाट खटिएको टोलीले उनीहरुलाई नगद दुई लाख २४ हजार पाँच सय २० रुपैयाँ र एक बुक ताससहित नियन्त्रणमा लिएको हो ।