दाह्री पालेका रवि लामिछानेको विज्ञापन सारी लगाउनेलाई

टेलिभिजन प्रस्तोता हुँदै राजनीतिमा छिरेर पूर्व उपप्रधान तथा गृहमन्त्री बनेका रवि लामिछाने सौन्दर्य सामग्रीको विज्ञापनमा पनि देखिन थालेका छन् । चितवन निर्वाचन क्षेत्र नम्बर २ बाट विजयी भएपछि संसदीय राजनीतिमा प्रवेश गरेका उनी महिलाले प्रयोग गर्ने विभिन्न सौन्दर्य सामग्रीको विज्ञापनमा देखिएका छन् । 

राष्ट्रिय स्वतन्त्र पार्टी (रास्वपा) को सभापतिसमेत रहेका उनको फोटो भएको हेयर जेल बजारमा पठाइएको छ । त्यस्तै,रास्वपाको चुनाव चिन्ह ‘घण्टी’ को आकारमा बनाइएको बट्टामा ‘आई ब्रो’ पनि पाउन थालिएको छ । ‘न्यूलुक’ हेयरजेलमा रविको कपाल ठाडोठाडो भएको देखिन्छ ।

सामाजिक सञ्जालमा समेत उनको कस्मेटिक्स सामानको विज्ञापन भाइरल बनेको छ । उक्त विज्ञापनमा ती सौन्दर्य प्रशाधन नेपालमै उत्पादन गरिएको उल्लेख छ । महिलामाझ लोकप्रिय भनिएका रविको चुनाव चिन्ह घण्टी आइब्रोमाथि कमेण्ट गर्दै एक सामाजिक सञ्जाल प्रयोगकर्ताले लेखेकी छन्, ‘वाहवाह ! कति राम्रो, कस्तो देख्नेबित्तिकै किन्न मन लाग्यो मलाई त !’ त्यस्तै,अर्काले भनेका छन्, ‘बालेन शाहको चस्माको सफलतापछि रविको काजल र हेयर जेल ।’

उपनिर्वाचनको तयारीमा जुटेका रविको प्रचार प्रसारको निम्ति उनको फोटो भएको हेयर जेल र घण्टी चिन्हको आइब्रो बजारमा पठाइएको एकथरीको अनुमान छ ।