कार्यवाहक पाकिस्तानी राजदूत सिंहदरबारमा

पाकिस्तानी कार्यवाहक राजदूत आज सिंहदरबार पुग्नुभएको छ । चार्ज डे अफेयर्स उमाएर अली परराष्ट्र मन्त्रालयका सहसचिव सुधिर भट्टराईसँग शिष्टाचार भेटवार्ताको लागि आज दिउँसो मन्त्रालय पुग्नुभएको बताइन्छ । 

कार्यवाहक राजदूत अली दिउँसो १ बजेको समयमा मन्त्रालय पुग्नुभएको थियो । उहाँहरुबीच झण्डै आधा घण्टा दुई मुलुकबीच कायम रहेको पारस्परिक र मैत्रीपूर्ण सम्बन्धलाई थप मजबुत बनाउने विषयमा छलफल भएको मन्त्रालय स्रोतले बताएको छ ।

नेपालका लागि नियुक्त पाकिस्तानी राजदूत अब्ररर हुसेन हश्मी छिट्टै कार्यभार सम्हाल्न काठमाडौं आउने दूतावास स्रोतले बताएको छ । उहाँ मार्च महिनाभित्रै काठमाडौं आउने तयारी छ । यसअघि संयुक्त राज्य अमेरिकाको ह्युस्टनस्थित पाकिस्तानी नियोगमा कन्सुलेट जनरलको जिम्मेवारीमा रहनुभएका अब्रररलाई नेपालका लागि राजदूत नियुक्त गरिएको हो ।