विश्वकप छनोटमा पुगेका क्रिकेट खेलाडीलाई वाग्मती सरकारद्वारा नगद पुरस्कार घोषणा

विश्वकप छनोटमा पुग्न सफल नेपाली क्रिकेट टोलीलाई बागमती प्रदेश सरकारले जनही एक लाख पुरस्कार दिने घोषणा गरेको छ । 

बागमती प्रदेशका मुख्यमन्त्री शालिकराम जम्कट्टेलले प्रदेश सरकारको तर्फबाट आज उक्त घोषणा गर्नुभएको हो । ‘खेलाडीको सम्मान र हौसलाको लागि बागमती प्रदेश सरकारले राष्ट्रिय क्रिकेट टिमका प्रत्येक खेलाडीलाई जनही एक लाख दिने निर्णय गरेको हो', उहाँले भन्नुभयो । 

बागमती प्रदेशका खेलाडीहरु समेत सम्मिलित उक्त टिमलाई बधाई दिँदै मुख्यमन्त्री जम्कट्टेलले थप प्रगति र सफलताको लागि शुभकामना पनि भन्नुभएको छ । 

नेपालले बिहीबार घरेलु मैदान किर्तिपुरमा यूएईलाई ९ रनले पराजित गर्दै विश्वकपको ग्लोबल क्वालिफायरमा स्थान बनाएको थियो । नेपालको ऐतिहासिक जितप्रति खुशी व्यक्त गर्दै प्रधानमन्त्री पुष्पकमल दाहाल प्रचण्डले पनि राष्ट्रिय टोलीका प्रत्येक खेलाडीलाई तीन लाखका दरले नगद पुरस्कार दिने घोषणा गर्नुभएको छ ।