सिमसार क्षेत्र पुर्न लगिएका दुईवटा टिपर महानगरको नियन्त्रणमा

फेवातालको सिमसार क्षेत्र पुरिरहेको अवस्थामा पोखरा महानगरपालिकाले दुई वटा टिपर नियन्त्रणमा लिएको छ । 

वाइयुके कन्स्ट्रक्सन एण्ड सप्लायर्स प्रालिका सञ्चालक युवराज खतिवडाको टिपर महानगरपालिकाले समातेको हो । रामसार क्षेत्र पुर्नका लागि खटिएका उनकै दुई वटा जेसिबी र एउटा टिपरको चाबी पनि महानगर प्रहरीले खोसेको छ । 

पटक-पटक आग्रह गर्दा पनि अटेर गरेपछि सवारी साधन नियन्त्रणमा लिनुपरेको पोखरा महानगर प्रहरी प्रमुख पुरुषोत्तम थापाले बताए । उनका अनुसार खतिवडा महानगरको पटके कारबाहीमा परिसकेका व्यक्ति हुन् । लामो समयदेखि फेवातालको सिमसार क्षेत्र पुर्दै आएका उनले यो कामका लागि प्रति रोपनी पाँच लाख रुपैयाँ लिने गरेको पाइएको छ । 

सिमसार क्षेत्र पुर्नका लागि उनले रातको समयमा काम गर्दै आएको स्थानीयको भनाइ छ ।