रैनापुरमा सशस्त्रको बिओपी उद्धघाटन

बाँकेको नरैनापुर गाउँपालिका-६ गंगापुरमा नवनिर्मित सशस्त्र प्रहरी बल नेपाल बोर्डर आउट पोष्ट (बिओपी)को उद्घाटन गरिएको छ ।

आज एक समारोहका बीच नम्बर ५ बाहिनी मुख्यालय रुपन्देहीका बाहिनीपति बिदुर खडका र नरैनापुर गाँउपालिकाका अध्यक्ष इश्तियाक अहमद शाहले संयुक्त रूपमा नवनिर्मित भवनको उद्घाटन गरेका हुन् ।

त्यस कार्यक्रममा बोल्दै बाहिनीपति खड्काले सीमा सुरक्षा बाहेक राष्ट्रले सुम्पेको अन्य जिम्मेवारीमा पनि तल्लीन भएर सशस्त्र प्रहरीले काम गरिरहेको बताए । मुलुकको भूमि एक इन्च पनि तलमाथि नहुने गरी सशस्त्रले संवेदनशील भई काम गर्ने उनको जिकिर छ ।

नागरिकको सुरक्षाका लागि सुरुमा सुरक्षाकर्मीलाई नै बलियो बनाउनुपर्ने भएकाले गंगापुरमा बिओपी स्थापना गरिएको बाहिनीपतिको भनाई छ । सीमा सुरक्षाका लागि सबैको भूमिका महत्त्वपूर्ण रहने बताउदै उनले भने, ‘सीमा सुरक्षा गर्ने जिम्मेवारी सुरक्षाकर्मीको मात्र हो भनेर भन्नू हुन्न तपाई हामी नागरिकको पनि उत्तिकै भूमिका रहन्छ ।’

नरैनापुर गाँउपालिकाका अध्यक्ष शाहले सशस्त्र द्वन्द्वको विषम परिस्थितिमा स्थापना भएको सशस्त्र प्रहरीले मुलुकको शान्ति सुरक्षामा महत्त्वपूर्ण भूमिका निर्वाह गरेको भन्दै प्रशंसा गरे । उनले महामारी, विपद् र अन्य प्रतिकूलतामा पनि सशस्त्र प्रहरीको महत्वपूर्ण भूमिका रहेको बताए ।

सीमा क्षेत्रमा सशस्त्र प्रहरीको निरन्तर डिउटीले गर्दा चोरी तस्करी कम भएको बताउदै अध्यक्ष शाहले भने, ‘पहिले गाउँमै आएर चोरी, डकैती हुने गरेको भन्ने सुन्ने गरिन थियो, अहिले त्यस्तो भएको छैन, सीमा क्षेत्रमा हुने अबैध ओसारपसार पनि रोकिएको छ ।’

कार्यक्रममा जिल्ला प्रहरी कार्यालय बाँकेका प्रहरी उपरिक्षक सन्तोष सिंह राठोर,राष्ट्रिय अनुसन्धानका उप-निर्देशक मोहन कुवर, नरैनापुर गाँउपालिकाका प्रमुख प्रशासकिय अधिकृत मणिराम खराल, सशस्त्रका डिएसपी दिपक चन्द, वडा नं. ५ का अध्यक्ष कृष्ण चन्द्र मौर्य, वडा नं. ६ का अध्यक्ष प्रेम मौर्य, नरैनापुरका लेखा अधिकृत भरत बस्नेत लगायतको सहभागिता रहेको थियो ।