उडिरहेको विमानका यात्रुले चालक दलका सदस्यलाई कुटेपछि एअर इण्डियाको विमान आकस्मिक अवतरण

नयाँ दिल्लीबाट बेलायतको राजधानी लण्डनतर्फ उडेको भारतीय ध्वजाबाहक एयर इन्डियाको एउटा विमान आकस्मिक रुपमा नयाँ दिल्लीमा अवतरण गरिएको छ । विमानका एक यात्रुले चालक दलका सदस्यहरुलाई भौतिक आक्रमण गरेपछि विमानलाई दिल्ली विमानस्थलमा आकस्मिक अवतरण गराइएको बताइएको छ ।

आज बिहान साढे ६ बजे हिथ्रो विमानस्थलका लागि उडेको विमान चालक दलका सदस्यले ककपिटमा रहेका चालकलाई यात्रुले गरेको झगडा र आक्रमणबारे जानकारी गराएपछि  बिहान १० बजे नयाँ दिल्ली विमानस्थलमा फर्काइएको थियो ।

एयर इन्डियाका अनुसार २५६ जना यात्रु लिएर दिल्लीबाट उडेको एआई–१ विमानमा यात्रुको आक्रमणपछि आकस्मिक अवतरण गराइएको हो । लगत्तै विमान कम्पनीले जारी गरेको विज्ञप्तिमा चालक दलका सदस्यको मौखिक र लिखित चेतावनीलाई वास्ता नगरी एक जना यात्रुले आक्रमण गरेपछि चालक दलका दुई सदस्यमाथि आक्रमण गरेको उल्लेख छ । विज्ञप्तिमा भनिएको छ, ‘त्यसपछि पाइलटले आफू दिल्ली फर्कने निर्णय गरे । विमान अवतरणपछि ती आक्रमणकारीलाई सुरक्षाकर्मीको जिम्मा लगाइएको छ ।’

प्रहरीले भारतीय दण्ड संहिताको धारा ३५४, ५०९ र ५१० तथा भारतीय विमान ऐनको धारा २३ अन्तर्गत एफआईआर दर्ता गरेको जनाएको छ ।