छोरो पाउनु कहिले कहिले भोटो सिइयो पहिले

अस्ति शुक्रवारबाट बल्ल फिल्म रिलिज भयो तर त्यसभन्दा पहिला पोष्टरै हेरेको भरमा जुरीले एक जनालाई उत्कृष्ट नायिकाको उपाधि दिएपछि बबाल छ । 

निर्देशक माधवराज खरेल संयोजक रहेको निर्णायक कमिटीले रिलिज हुनै बाँकी रहेको बगान फिल्मकी नायिकालाई उत्कृष्ट अभिनेत्रीको अवार्ड बाँडेको छ । कमिटीमा चलचित्र पत्रकारद्वय विजयरत्न तुलाधर, विष्णु सुवेदी, लोकगायक कुलेन्द्र विश्वकर्मा, गायक शिव परियार, मेकअप आर्टिस्ट विक्रम गौतम, सञ्चारकर्मी दीर्घराज उपाध्याय, सञ्चारकर्मी कमलनाथ अधिकारी र फिल्म अर्काइभिष्ट चिरञ्जीवी गुरागाईं थिए जसले अस्ति २९ गतेबाट प्रदर्शनमा आएको चलचित्र बगानकी नायिका प्रमिला कार्कीलाई उत्कृष्ट को अवार्ड बाँडेको हो । 

उनले डेब्यु गरेको फिल्म भने प्रदर्शन हुनै बाँकी छ । जुरीहरूले पोष्टर हेरेकै आधारमा उत्कृष्ट नायिकाको अवार्ड बाँडिदिएपछि स्वयं ‘लज्जासमेत लाजले पानी पानी’ हुन पुगेको चर्चा । सरोज खनालले निर्देशन गरेको उक्त सिनेमामा प्रमिला र करिष्मा मानन्धर मुख्य भूमिकामा देखिन्छन् । करिष्मा विधवा महिलाको भूमिकामा देखिँदै छिन्, बगानमा सरोज खनाल, आकाश श्रेष्ठ, निर शाह, बसुन्धरा भुसाल, मिथिला शर्मालगायतको अभिनय देख्न पाइन्छ । सुरेश वाग्ले निर्माता रहेको बगानकी नायिकाले अनुप बरालसँग अभिनय सिकेकी हुन् । यसअघि टेलिभिजनको भिजे हुँदै केही म्युजिक भिडियोमा अभिनय गरेकी प्रमिलालाई अवार्ड बाँडिएको हो, अस्ति जमलस्थित राष्ट्रिय नाचघरमा । पूर्वउपराष्ट्रपति परमानन्द झाले उद्घाटन गरेको पाम नेपाल फिल्म फेस्टिभलमा हो यस्तो गाईजात्रा भएको । 

बगानको गीत, टिजर र ट्रेलर मात्रै सार्वजनिक भएको छ । पूरा फिल्म रिलिज हुनै बाँकी छ, पोष्टर र ट्रेलर हेरेरै जुरीहरूले अवार्ड बाँडेपछि अहिले सामाजिक सञ्जाल मज्जाले तातेको छ । आर्यन सिग्देलले डिसेम्बर फल्सबाट उत्कृष्ट अभिनेताको अवार्ड थाप्दा पहिलो चलचित्र आमाकी अभिनेत्री भुवन चन्दले दीर्घसाधना सम्मान हात पारिन् भने सम्राट बस्नेतले लाखेबाट उत्कृष्ट फिचर फिल्म निर्देशकको अवार्ड पाए ।