क्रिकेट टोली भारत पठाउन तयार पाकिस्तानको मुख्य चासो खेलाडीको सुरक्षा

पाकिस्तानले आगामी आईसीसी क्रिकेट विश्वकप २०२३ मा सहभागी हुन आफ्नो क्रिकेट टोली भारत पठाउने निर्णय गरेको छ । पाकिस्तानी विदेश मन्त्रालयले त्यसबारे औपचारिक जानकारी गराएको छ ।

खेलकुदलाई राजनीतिसँग जोडेर हेर्न नहुने मान्यतामा जोड दिँदै पाकिस्तानले उक्त निर्णय गरेको विदेश मन्त्रालयको विज्ञप्तिमा उल्लेख छ । ‘दुई देशको राजनीतिक विवादलाई अन्तर्राष्ट्रिय क्रिकेटमा समावेश गर्न हुँदैन । एसिया कपको निम्ति भारतीय टोली पाकिस्तान नआउन सक्छ, तर पाकिस्तानले आफ्नो टोलीसँग त्यस्तो गर्दैन,’ विज्ञप्तिमा भनिएको छ ।

तर पाकिस्तानले आफ्नो क्रिकेट टोलीको सुरक्षालाई लिएर चिन्ता जाहेर गरेको छ । यसबारे अन्तर्राष्ट्रिय क्रिकेट काउन्सिल र भारतीय अधिकारीहरुलाई जानकारी गराएकाले भारतमा पाकिस्तानी क्रिकेट टोलीको सुरक्षा सुनिश्चितता हुने पाकिस्तानले विश्वास लिएको हो ।

यस पटकको एक दिवसीय विश्वकप अक्टोबर ५ देखि भारतमा हुँदैछ । उद्घाटन खेल इङल्याण्ड र न्युजिल्याण्डबीच हुने खेल तालिका छ । पाकिस्तानले आफ्नो पहिलो खेल भोलिपल्ट नेदरल्याण्डसँग खेल्नेछ । टोलीको दोस्रो खेल श्रीलंकासँग हुने छ भने ती दुवै खेल हैदरावादमा हुने बताइएको छ ।