प्रधानमन्त्रीको भोलिको व्यस्तता रुकुम पूर्वमा

प्रधानमन्त्री रुकुम पूर्व जान लाग्नुभएको छ । उहाँ भोलि बिहान १० बजे बालुवाटारबाट नेपाली सेनाको एनए ०५७ एमआई १७ हेलिकोप्टरमा त्यसतर्फ जाने बताइएको छ ।

उहाँ पुथाउत्तरगंगा गाउँपालिको वडा नम्बर १ मैकोट जान लाग्नुभएको हो । नेकपा माओवादी केन्द्र रुकुम पूर्वले प्रधानमन्त्रीको आगमनबारे जानकारी दिएको छ । पार्टीको तीन महिने विशेष रूपान्तरण अभियान अन्तर्गत उहाँ रुकुम पूर्व आउन लाग्नुभएका हो । 

अभियानका लागि सात वटै प्रदेशका सात वडामा पुग्ने कार्यक्रम अन्तर्गत प्रधानमन्त्री समेत रहनुभएका पार्टी अध्यक्ष प्रचण्ड भोलि त्यहाँ जान लाग्नुभएको नेकपा माओवादी केन्द्र रुकुम पूर्वका संयोजक कुमारी बरालले जानकारी दिए ।

सोही क्रममा जिल्लाका सहिद परिवार तथा घाइते अपाङ्गहरूसँग भेटघाट गर्नुहुने छ । मैकोटमा परम्परागत रुपमा लाग्दै आएको मइँ छिउ मगराँत उत्सव २०८० को उद्घाटन गर्ने कार्यक्रम राखिएको छ ।

प्रधानमन्त्री प्रचण्ड पार्टी अभियानको सिलसिलामा यसअघि रुकुम पश्चिमको बाँफिकोट गाउँपालिका ६ मग्मा पुग्नुभएको थियो । भोलि अपरान्ह राजधानी आउने क्रममा उहाँ पोखरा हुँदै फर्कने बताइएको छ ।