प्रहरीले अपरेशन चलाएको भन्दै सरकारविरुद्ध संघर्षको चेतावनी

नेकपा (माओवादी)का महासचिव नेत्रविक्रम चन्दले सुशीला कार्की नेतृत्वको सरकारले आफ्नो पार्टीलाई युद्धमा धकेल्ने प्रयास गरिरहेका भन्दै आपत्ति जनाएका छन् ।

कपिलवस्तु र अर्घाखाँचीमा रहेको पार्टीको श्रम शिविरमा प्रहरीले अपरेशन गरेर आफ्नो पार्टीलाई निर्वाचनमा नभई युद्धमा होम्ने चेष्टा गरिरहेको भन्दै उनले आक्रोश व्यक्त गरेका हुन् । सो ठाउँमा रहेका प्रहरी तत्काल फिर्ता नबोलाए सरकारविरुद्ध कडा संघर्षमा होमिने विप्लवले चेतावनीसमेत दिए ।

आज काठमाडौंमा आयोजित एक कार्यक्रममा उनले आक्रोशित हुँदै प्रश्न गरे,‘हाम्रो केन्द्रीय कम्युनमा प्रहरीहरूको अपरेशन भयो । हामी सुशीलालाई यहीबाट थ्रेट गर्न चाहन्छौँ–राम्रोसँग सुन–तिमीले चुनाव गर्न चाहेको हौ कि युद्ध गर्न चाहेका हौ ?’

सो ठाउँबाट प्रहरी फिर्ता बोलाउने र अपरेशन गर्नु गलत थियो भनी माफी नमागे सरकारले ठूलो मूल्य चुकाउनुपर्ने चेतावनी पनि विप्लवले दिएका छन् ।

‘हामी त दर्ता गरेर सबै मूल्य मान्यता पालना गरेर निर्वाचनमा जान खोज्दैछौँ नि । यतापट्टीको हाम्रो इमान्दारिता, स्वाभिमानता, साम्राज्यवादीहरूसँगको हाम्रो लडाईंलाई, यहाँको दलालसँगको हाम्रो लडाईंलाई घुमाउरो तरिकाले सोचेर हिजोको रोल्पामा रोमियो अपरेसन गरेर जनयुद्ध जन्माएको जस्तो यदि तिमीले अर्को परिकल्पना गरेका छौ । र हाम्रो केन्द्रीय कम्युनबाट तुरन्तै पुलिस फिर्ता गरेनौ र त्यहाँ भएका सबै गल्तीमा माफी मागेनौ भने मूल्य चर्को पर्छ भन्ने हामी भन्न चाहन्छौँ’, उनले थपे । 

सो पार्टीका प्रवक्ता खडगबहादुर विश्वकर्माले पनि यस्तो कार्यले देशलाई अशान्तितिर धकेल्ने चेतावनी दिएका छन् । 

सो पार्टीका अनुसार अर्घाखाँचीको सितगङ्गा–११, मा अवस्थित कम्युन र सर्वसाधारण जनताको घरमा हिजो प्रहरीले छापा मारेको थियो । यसबाट त्यहाँ आंतक मच्चिएको जनाउँदै माओवादीले घोर भर्त्सना गरेको छ । 

‘सरकारले एकातिर शान्तिपूर्ण चुनावको वातावरण बनाउने प्रचार गर्ने अर्कोतिर माओवादीका उत्पादन केन्द्र र सर्वसाधारण जनताका घरमा छापा मार्ने कार्यले राज्य शान्तिपूर्ण निकास चाहदैँन बरु देशलाई अशान्तितिर धकेल्न चाहन्छ भन्ने पुष्टि भएको छ,’ विश्वकर्माले भनेका छन् । 

प्रहरीको छापामारी एवं दमनको निष्पक्ष छानबिन गर्न मानवअधिकारवादीलाई उनले आग्रहसमेत गरे ।