अष्ट्रेलिया पुगेको नेपाली टोली भेटघाटमा व्यस्त

अष्ट्रेलिया भ्रमणमा रहनुभएका राष्ट्रिय सभाका अध्यक्ष गणेशप्रसाद तिमिल्सिनाले त्यहाँका समकक्षी मिल्टन डिकसँग भेटवार्ता गर्नुभएको छ । अष्ट्रेलियाली संसदमा आज भएको भेटमा उहाँहरूबीच द्विपक्षीय भ्रमण आदानप्रदानबारे छलफल भएको बताइएको छ ।

अध्यक्ष तिमिल्सिना संसदीय प्रतिनिधिमण्डलको नेतृत्व गर्दै सोमबार राति अष्ट्रेलिया जानुभएको हो । प्रतिनिधिमण्डल हिजोदेखि भेटघाटमा व्यस्त रहेको त्यहाँस्थित नेपाली दूतावासले जनाएको छ ।

अब उक्त टोली भिक्टोरियाको संसद् भ्रमणमा जाँदै छ ।  अध्यक्ष तिमिल्सिना नेतृत्वको टोलीमा सात वटै प्रदेशका सभामुख र उपसभामुख गरेर सात जना, राष्ट्रिय मुस्लिम आयोगका अध्यक्ष, राष्ट्रिय समावेशी आयोगका सदस्यलगायत छन् ।