एउटा हातले लाइसेन्स दिएर अर्कोले नोटको मुठो समातेको कर्मचारीहरुको आरोप

नयाँ स्टक एक्सचेञ्जको लाइसेन्स दिने प्रक्रियामा गम्भीर आर्थिक चलखेल भएको आरोप लगाइएको छ । नेपाल स्टक एक्सचेञ्ज (नेप्से) को नियामक निकाय नेपाल धितोपत्र बोर्ड र केही व्यापारिक समूहबीच आर्थिक चलखेल भएको समाचारहरु बाहिरिएपछि नेप्से कर्मचारी संघले छानबिनको माग गरेको छ । 

धितोपत्र बोर्डका उच्च अधिकारी र व्यापारिक समूहबीच भएको आर्थिक मिलेमतोबारे आइरहेको समाचारका कारण धितोपत्रको दोस्रो बजार कारोबारमा समेत नकारात्मक प्रभाव परेको उल्लेख गर्दै संघले छानबिनको माग गरेको हो ।

‘नेपालमा धितोपत्रको दोस्रो बजार सञ्चालनको लागि नयाँ स्टक एक्सचेञ्जलाई इजाजतपत्र दिने विषयमा पूँजी बजारको नियामक निकाय नेपाल धितोपत्र बोर्डको नेतृत्व र विभिन्न व्यापारिक स्वार्थ समूहहरुबीच आर्थिक मिलेमतो रहेको भनि विभिन्न राष्ट्रिय स्तरका प्रतिष्ठित सञ्चारमाध्यमहरुमा निरन्तर समाचार प्रकाशित हुँदै आएको सर्वविदितै छ । जसका कारण धितोपत्रको दोस्रो बजार कारोबारमा समेत नकारात्मक प्रभाव परेको...’, जारी विज्ञप्तिमा उल्लेख छ । 

नयाँ स्टक एक्सचेञ्जको लाइसेन्स वितरणलाई लिएर विभिन्न समाचार आउँदा पनि छानबिन नहुनुले मिलेमतो रहेको प्रष्ट भएको संघका अध्यक्ष नवराज थापाले बताए । विदेशी स्टक कम्पनीसँग सम्झौता गरेको हिमालयन स्टक एक्सचेञ्जलाई निर्णायक अंक दिन लागिएको उनको भनाई छ । 

उनका अनुसार बोर्डले नयाँ लाइसेन्सका लागि आवेदन आह्वान गरेको आठ दिनपछि २०७९ असोज १० गते हिमालयन स्टक एक्सचेन्जले मौरिससको कम्पनीसँग एमओयू गरेको हो । बोर्डले त्यसपछि हिमालयनलाई नै लाइसेन्स दिने गरी निर्देशिका तयार पारेको उनको आरोप छ । 

‘हिमालयन स्टक एक्सचेञ्जले मौरिससको कम्पनीसँग सम्झौता गरेका विषयहरु सार्वजनिक भइरहेका छन् । नेपालको इजाजतपत्र नै नभएको कम्पनीलाई कसरी निर्णायक अंक दिन लागियो ? यत्रो विषय बाहिर आइसक्यो, तर छानबिन भएको छैन । यहाँ बोर्डका पदाधिकारी, राजनीतिक पार्टीदेखि सांसदसम्मको मिलेमतो छ । लहरो तान्दा पहरो आउने डरले छानबिन नगरिएको हो’, उनले भने ।