'काँग्रेस सरकारमा हुँदा कुशासन किन' भन्दै उसकै कार्यकर्ता सडकमा

सत्तारुढ नेपाली कांग्रेसको भातृ संस्था नेविसंघ एनसिएल खरिद बिक्री प्रकरण भएको भनिएको अनियमितताविरुद्ध सडकमा ओर्लिएको छ ।

भ्रष्टाचार तथा अनियमितताका विरुद्ध सरकार र सरोकारवालाहरुलाई खबरदारी गर्न नेविसंघले आज काठमाडौँमा विरोध जुलुस निकालेको हो । संगठनका केन्द्रीय सदस्य जय बरालको नेतृत्वमा निस्किएको जुलुसमा मनोज पुरी,पद्मकन्या क्याम्पसका स्ववियु सचिव भुपीश्वेरी ऐर, सदस्य पूर्णिमा परियारलगायत ५०/६० जनाको संख्यामा सहभागी छन् । 

अनुहारमा सेतो मास्कहरु लगाई,पार्टीको झण्डा बोकेका नेविसंघका कार्यकर्ताहरुले 'कांग्रेस सरकारमा रहँदा कुशासन किन ?', 'भ्रस्टाचार, कुशासन र अनियमितता कहिलेसम्म ?', करप्सन इज डेमोक्रेसी ? पार्डन मि प्लिज', 'करप्ट लेट अस डिसरप्ट', 'इनफ इज इनफ # एनसिएल', 'माफ गर्नुहोला तपाईंले तिर्नु भएको कर पर्याप्त छैन', 'भ्रस्टाचारले नागरिकलाई च्वास्सै च्वास्सै', 'ट्रान्सपरेन्सी इज मैथ, करप्सन इज रियल', लेखिएका प्लेकार्ड देखाएका छन् । 

पद्मकन्या क्याम्पसबाट निस्केको र्याली रणदिप पुल,भद्रकाली,सुन्धारा हुँदै शान्तिवाटीका पुगेर कोणसभामा परिणत भएको छ ।