लण्डनमा रविसँग माओवादी नेताको 'आकस्मिक' भेट,अनेक आशंका

विदेशमा रहेका नेपालीलाई स्वदेश फर्काएर रोजगार बनाउने एजेण्डामा राजनीति गरिरहेका पूर्वगृहमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछाने अहिले संगठन विस्तार र चन्दा संकलनका लागि बेलायतमा छन् । 

काठमाडौंबाट श्रीमतीसहित मलेसिया पुगेका उनी त्यतैबाट बेलायत गएका थिए । पार्टीको संगठन निर्माण, सडक उद्घाटनलगायतका कार्यक्रम लिएर त्यता पुगेका उनी विभिन्न भेटघाटमा व्यस्त छन् । 

यसै क्रममा उनको एउटा भेटलाई लिएर अनेकथरी आशंका गर्न थालिएको छ । कोशी प्रदेशको पूर्वयोजना आयोगका उपाध्यक्ष पूर्ण लोक्समसंग उनको भेटलाई लिएर माओवादी वृत्त आशंकित भएको छ । 'नयाँ'को हावा हुण्डरी चलिरहेका बेला कफी सपमा भएको व्यवस्थित भेटघाटलाई 'अकस्मात भेट' भनेर फेसबुकमा हालिएपछि बेलायत बस्ने माओवादी कार्यकर्ताले शंका गरेका हुन् । 

लण्डनको एक युनिभर्सिटीमा अर्थशास्त्रको प्राध्यापक रहेका लोक्सम राजेन्द्र राई मुख्यमन्त्री भएका बेला योजना आयोगको उपाध्यक्ष भएका थिए । त्यसअघि सदस्य थिए । प्रधानमन्त्री/मुख्यमन्त्री जुन दलको छ,सोही पार्टी निकटलाई उपाध्यक्ष बनाउने प्रचलन रहीआए पनि बेलायतबाट फर्किएका उनलाई एकीकृत समाजवादी नेतृत्वको सरकारले उक्त जिम्मेवारी दिएको थियो । 

हाल एमाले उपाध्यक्ष रहेका रामबहादुर थापा बादल निकट मानिने उनी अहिले बेलायतमै छन् । उनले कफीसपभित्र रविसँग खिचेको फोटो फेसबुकमा शेयर गर्दै 'पूर्वउपप्रधान / गृहमन्त्री तथा सांसद रवि लामिछानेज्यूसँग अकस्मात जम्काभेट !' लेखेका छन् ।