पत्रकार सम्मेलनमा बृध्दले ओलीसँग खीर मागेपछि

नेकपा एमालेले १८ दिन लामो मध्यपहाडी लोकमार्ग केन्द्रित संकल्प यात्राबारे जानकारी दिन हिजो पत्रकार सम्मेलन आयोजना गरेको थियो । यात्राका अनुभव र त्यसले दिएको सन्देशबारे आमनागरिकलाई जानकारी गराउन भनी अध्यक्ष केपी शर्मा ओलीका तर्फबाट बोलाइएको विशेष पत्रकार सम्मेलनका लागि सञ्चारकर्मीहरु च्यासल पुगेका थिए । 

सम्मेलनमा एमालेका शीर्ष नेता,कार्यकर्ता र सुरक्षाकर्मीहरुको पनि बाक्लै उपस्थिति थियो । पूर्वप्रधानमन्त्रीसमेत रहनुभएका अध्यक्ष ओलीले यात्राका अनुभूतिहरु शेयर गर्नुभयो । यात्राको महत्व र सन्देशबारे व्याख्या गर्दै पछिल्लो समय जनतामा आइरहेको नैराश्यता चिर्न सफल भएको भनाई राख्नुभयो । 

सञ्चारकर्मीहरुले आफ्ना जिज्ञासा राखे । ओलीले जवाफ दिनुभयो । पत्रकार सम्मेलन सकियो । त्यसपछि शुरु भयो खाजा समय । एमालेले उपस्थित पत्रकारहरुलाई त्यहीँ खाजाको व्यवस्था गरेको थियो । 

'तपाईंको कार्यालय सचिव प्लेट र कप बोकेर बाँडिरहेका छन् । तपाईं पनि डाडु लिएर खिर बाँड्न आउने होला नि हैन !'

खिर,बोडीको तरकारी र अचार थियो,खाजामा । लाइनमा उभिएकाहरुलाई केन्द्रीय कार्यालय सचिव डा. भिष्म अधिकारीले प्लेट, चम्चा र कप दिइरहेका थिए । त्यत्तिकैमा अध्यक्ष ओली पनि त्यतै आइपुग्नुभयो । 

लाइनमा उभिएका एकजना झोला बोकेका उमेरले अलि पाको देखिने व्यक्तिले ओलीतिर हेर्दै भने, 'तपाईंको कार्यालय सचिव प्लेट र कप बोकेर बाँडिरहेका छन् । तपाईं पनि डाडु लिएर खिर बाँड्न आउने होला नि हैन !' उनको कुरा सुनेर निकैबेर हाँसोको फोहोरा छुट्यो।

ओलीले भने केही जवाफ दिनुभएन । त्यहाँ खटिएका सुरक्षाकर्मीहरुले हातको इशाराले 'चुप लाग्न' भनेपछि हाँसो शान्त भयो । पछि खाजा खाने बेला प्रहरीहरु समेत त्यही कुरा सम्झेर मुर्च्छा पर्दै हाँसिरहेका थिए।