समाजवादीको तीनदिने बैठक कान्तिपुर गार्डेनमा शुरु

सत्तारुढ नेकपा एकीकृत समाजवादीको केन्द्रीय कमिटी बैठक शुरु भएको छ ।

तीनदिनसम्म चल्ने बैठक ललितपुरको बालकुमारीस्थित कान्तिपुर गार्डेन पार्टी प्यालेसमा आज मध्यान्हबाट शुरु भएको हो । बैठकमा पार्टीको विधान संशोधन, आगामी महाधिवेशन, राष्ट्रियसभा निर्वाचनलगायतका विषय मूल एजेन्डा रहेको जनाइएको छ ।

अध्यक्ष माधव कुमार नेपालको अध्यक्षतामा बसिरहेको बैठकमा सम्मानित नेता झलनाथ खनाल, उपाध्यक्ष राजेन्द्र प्रासाद पाण्डे, घनेन्द्र बस्नेत, महासचिव घनश्याम भुसाल, उप-महासचिव गंगालाल तुलाधर, सचिव रामकुमारी झाँक्री, भौतिक पूर्वाधार मन्त्रीसमेत रहेका नेता प्रकाश ज्वालालगायत सबैजसो केन्द्रीय सदस्यहरु सहभागी छन् ।