पृथ्वी नारायणको सम्झनामा कमल थापाको चियापान, राजेन्द्र लिङ्गदेन भृकुटीमण्डपमा

राजसंस्था पुनर्स्थापना र हिन्दु राष्ट्रको एजेण्डामा राजनीति गरिरहेको पूर्वपञ्चहरुको पार्टी राप्रपा र राप्रपा नेपालले पृथ्वी जयन्तीको अवसरमा काठमाडौँमा छुट्टाछुट्टै कार्यक्रम गरेका छन् ।

राप्रपाले भृकुटीमण्डपमा विशेष कार्यक्रम आयोजना गरेको छ । त्यसअघि अध्यक्ष राजेन्द्र लिङ्गदेनको नेतृत्वमा मध्याह्न १२ बजेको समयमा बाजागाजासहित भृकुटीमण्डपबाट सिंहदरबार अगाडिसम्म र्याली निकालिएको थियो । र्यालीमा राप्रपाका नेता र कार्यकर्ताहरुको बाक्लो उपस्थिति थियो ।

सिंहदरबारअगाडि पुगेर लिङ्गदेनले त्यहाँ रहेको पृथ्वी नारायणको शालिकमा माल्यार्पण गरेपछि अहिले भृकुटीमण्डपमै फर्किएर राप्रपाले औपचारिक कार्यक्रम गरेको हो । 

यता, राप्रपा नेपालले चियापान समारोह गरेको छ । रामशाह पथस्थित बग्गी खाना नजिकै स्काई पार्टी प्यालेसमा दिउँसो चियापान समारोह आयोजना गरिएको हो । 

कार्यक्रममा अध्यक्ष कमल थापा, उपाध्यक्ष राजीव पराजुली, महामन्त्री राजाराम बर्तौलालगायत दुई सयजनाको सहभागिता रहेको जनाइएको छ ।  

आधुनिक नेपालको एकीकरणकर्ताको रुपमा पृथ्वी नारायण शाहको भूमिकाको उच्च प्रशंसा गर्दै अन्य राजतन्त्र पक्षधर तथा विभिन्न हिन्दुवादी संघ संस्थाहरुले पनि आज देशभर विभिन्न कार्यक्रम आयोजना  गरेका छन् ।