अध्यक्ष ओली आउने कार्यक्रमलाई काँग्रेसले बहिष्कार गर्ने

पाँचपोखरी थाङपाल गाउँपालिकाको नवनिर्मित प्रशासकीय भवन उद्घाटन समारोहलाई नेपाली काँग्रेसले बहिष्कार गर्ने भएको छ । उद्घाटनका लागि नेकपा एमालेका अध्यक्ष एवम् पूर्वप्रधानमन्त्री केपी शर्मा ओलि भोलि पाँचपोखरी थाङपाल गाउँपालिका वडा न ६ मा आउदै हुनुहुन्छ । भवन उद्घाटन जस्तो कार्यलाई पनि राजनीतिकरण गरेको भन्दै नेपाली काँग्रेस पाँचपोखरी थाङपाल गाउँपालिका कार्यसमितिले बाहिष्कार गर्ने निर्णय गरेको बताइएको छ ।

उद्घाटन कार्यक्रमलाई राजनीतिकरण गर्दै अनावश्यक खर्च र तामझामसहित पालिकाले पार्टीगत स्वार्थ देखाएको हुनाले काँग्रेसले भवन उद्घाटन कार्यक्रम बहिष्कार गर्ने निर्णय गरेको नेपाली काँग्रेस पाँचपोखरी थाङपाल गाउँपालिकाका सभापति प्रेम दोङले बताए ।

यता भवन उद्घाटन समारोह तय भइसकेको गाउँपालिकाले जनाएको छ । गाउँपालिकाका  मुकुन्द पाण्डेका अनुसार बुधबार हेलिकोप्टरबाट अध्यक्ष ओलि र श्रीमती राधिका शाक्यसहित काठमाण्डौंबाट सिधै पाँचपोखरी अवतरण हुनेछ । ४२ सय मिटरको उचाइमा रहेको सिन्धुपाल्चोक जिल्लाकै धार्मिक एवम् पर्यटकीय स्थल पाँचपोखरीको पाँचै वटा कुण्ड अवलोकन पश्चात अध्यक्ष ओलिले विहान ११ बजे गाउँपालिकाको नवनिर्मित भवन उद्घाटन गर्ने कार्यक्रम रहेको बताइएको छ ।