अमेरिका उड्नुअघि सरकार नढाल्ने सल्लाह, अध्यक्ष नफर्कंदै पार्टी छिन्नभिन्न

दुई साता अघिसम्म राजनीतिक दलहरुको आन्तरिक छलफलको निश्कर्ष हिजो दिउँसोको भन्दा ठीक उल्टो थियो । सरकार अहिल्यै नढल्ने, मन्त्रिपरिषदमा सहकारी ठगीबारे लामो छलफल भएको, माधव नेपालले बोलेअनुसार भाग पाउँदै गएको र रञ्जिता चौधरी छिट्टै मन्त्री हुने चर्चा गरिएको थियो । 

त्यस्तै निचोड निकाले अमेरिका उडेनका जसपा अध्यक्ष उपेन्द्र यादव आज राति काठमाडौं आइपुग्दै छन् । तर, उनी स्वदेश फर्कने क्रममा हिजो कतारको राजधानी दोहा आइपुग्दा नपुग्दै यता पार्टी औपचारिक रुपमा विभाजनमा गएको छ । 

अमेरिका जानुअघि महाधिवेशन तयारीका निम्ति दुई साताअघि सम्पन्न कार्यकारी समितिको बैठकमा उपेन्द्रले ढुक्कका साथ परिस्थिति आफ्नो अनुकूलमा रहेको रिपोर्टिङ गरेका थिए । उनले सरकार सञ्चालनमा अहिले खासै समस्या नभएको कारण यही सरकारलाई टिकाएरै जानुपर्ने धारणा राखेको बताइन्छ । बाहिर चर्चा भएजस्तो वाह्य हस्तक्षेप वा आन्तरिक चलखेलका कारण सरकार अहिले नै धरापमा परिहाल्ने त्यस्तो केही नभएको आफ्ना सहकर्मीसँग सुनाएका थिए ।

नेकपा एकीकृत समाजवादीका अध्यक्ष माधवकुमार नेपालले अहिलेको सत्ता समीकरण धेरै अगाडि जाने कुरामा शंका व्यक्त गर्दै गर्नुभएका भाषण ‘बार्गेनिङ पावर बढाउनमात्रै हो’ भन्दै उनले थपे, ‘उहाँको धेरैजसो कुरा मिलिसकेको छ ।’ बरु, सहकारी ठगीमा मुछिएका रवि लामिछानेका कारण सरकार र स्वयं रवि पनि समस्यामा परेको भन्ने उक्त बैठकमा चर्चा भयो । कांग्रेसले फेरि पनि संसद अवरुद्ध गर्ने र त्यसबाट बजेट ल्याउने काम प्रभावित हुने हुँदा रविलाई गृहबाट हटाउने वा उनले सरकार छोड्ने सम्भावनाबारे चर्चा भएको जसपाका नेताहरुले त्यतिबेला बताएका थिए ।

बैठकमा चलेको चर्चाअनुसार, पार्टीभित्र प्रधानमन्त्री प्रचण्डलाई पनि समस्या छ । एमालेलाई खुशी पार्न नसके केही उपलब्धी नहुने कारण गत उपनिर्वाचनमा कतै पनि दावी गर्ने अवस्था भएन । त्यसमाथि प्रचण्ड प्रधानमन्त्री भएकै बेला लगालग आफ्नो पार्टीका कृष्णबहादुर महरा, कालिबहादुर खाम, दिपेश पुनसहितका नेताहरु विभिन्न अभियोगमा समातिने क्रम बढ्यो । यसले प्रचण्डलाई निराशा र तनाव दुबैमा पारेको चर्चा गरियो ।

अर्कातिर, नागरिक उन्मुक्ति पार्टीकी अध्यक्ष रञ्जिता चौधरीले उपयुक्त मन्त्रालय खाली गरिदिए आफू सरकारमा सामेल हुने सन्देश दिएकी छन् । बिहीबारको मन्त्रिपरिषद् बैठक लम्बिनुको कारण थियो, सहकारी ठगीका मामिलालाई कसरी हल गर्ने भन्नेबारे घनीभूत छलफल चल्नु । उपप्रधानमन्त्री रवि लामिछानेसहित मुछिएको सहकारी ठगीका अनेकन आरोप र उजुरी छन् । तिनलाई हल गर्नका निम्ति अलग्गै कानुन चाहिने वा मौजुदा कानुनअनुसार अगाडि बढ्ने भन्ने विषयमा मन्त्रीहरुले धारणा राखेको कुरा बैठकमा उपेन्द्रले सुनाएका थिए ।

उपेन्द्र पार्टीको कार्यवाहक अध्यक्षको जिम्मेवारी उपाध्यक्ष राजेन्द्र श्रेष्ठलाई दिएर अमेरिका गएका हुन् । कार्यकारी समितिको बैठकमा महाधिवेशन प्रतिनिधि छनौटसम्बन्धी मापदण्ड तयार भएको थियो । पार्टी सदस्य १ लाख ४५ हजार छन् । दुई सयबराबर एकजना प्रतिनिधि छानिने भएको छ । दुई सयभन्दा मुनि सदस्य भएको जिल्ला समितिलाई दुईदेखि बढीमा अधिकतम् तीन जना प्रतिनिधि ल्याउन दिइनेछ ।

राष्ट्रिय समितिबाट तीन, प्रदेश समितिलाई पाँचका दरले थप प्रतिनिधि तोकिएको छ । जनसंगठनका केन्द्रीय कमिटीलाई तीनदेखि सातसम्म प्रतिनिधि ल्याउन भनिएको छ । कूल प्रतिनिधिमध्ये पाँच प्रतिशत प्रतिनिधि मनोनीत हुनेछन् ।

तर, उनै कावा अध्यक्ष श्रेष्ठसहितको समूहको पहलमा पार्टी विभाजित भएको छ । नेता अशोक राईलाई समूहले नयाँ पार्टीको अध्यक्षमा अघि सारेको छ । यता, यादव समूहले विभाजनबारे छलफल गर्न भोलि बिहान संसदीय दलको बैठक डाकेको छ । यादव मध्यरातमा काठमाडौं ओर्लंदै छन् ।