'पार्टी फुटाउँदै छ' भनेर बालुवाटारबाट हल्ला चलाइएको जनार्दनको दाबी

नेकपा माओवादी केन्द्रका उपमहासचिव जनार्दन शर्माले अध्यक्ष पुष्पकमल दाहाल प्रचण्डमाथि पार्टीमा गुटबन्दी चलाएको आरोप लगाएका छन् ।

मूल नेतृत्वले नै 'फलानाले पार्टी फुटाउँदै छ' भन्ने हल्ला फैलाएको दाबी गर्दै उनले यसलाई अध्यक्षले चलाएको गुटबन्दी भनेका हुन् । जारी स्थायी कमिटी बैठकमा १४ पृष्ठको फरक सांगठनिक प्रस्ताव अघि सार्दै शर्माले फरक मत राखेकै कारण आफूमाथि त्यस्तो आरोप लागेको दाबी गरे । 

फरक प्रस्तावको 'पार्टी फुटबारे चलाइएको हल्ला सम्बन्धमा' शीर्षकमा उनले लेखेका छन्, 'खुमलटारबाट फलानो एमालेमा जाँदैछ भनेर शुरु गरिएको प्रचारवाजीलाई बालुवाटार पुगेपछि तीव्रता दिइयो । उक्त प्रचारवाजीलाई मद्दत पुग्नेगरी पोखरामा आइपुग्दा मूल नेतृत्वले नै पार्टी फुटतिर उन्मुख छ कसलाई साथ भन्दै कार्यक्रम हलमा हुटिङ गराएपछि सुन्नेहरुलाई पार्टी फुट्ने पक्कापक्की भन्ने लाग्यो ।'

त्यसपछि देशभर असर देखा पर्न थालेको जनाउँदै शर्माले आम कार्यकर्ता र जनतामा पार्टी फुटको त्रास फैलिएको बताएका छन् । स-साना अन्तरविरोध समाधान गर्न झन् ठूलो अन्तरविरोध सृजना गरिदिनुपर्छ भन्ने अध्यक्ष प्रचण्डको मान्यताले यसमा काम गरेको शर्माको दाबी छ ।

विभिन्न समयमा आफूले लिएको अडान र प्रश्नकै कारण यस्तो हल्ला चलाइएको जिकिर गरेका उनले भनेका छन्  'ति प्रश्नको उत्तर दिने झन्झटतिर लाग्नुभन्दा आम पंतिलाई तरंगित पार्ने विषय हालिदिएर ध्यान अन्यत्र मोड्ने उद्धेश्य रहेको छ ।' शर्माले १२ बुँदामा त्यसको ब्याख्यासमेत गरेका छन् ।