व्यापारीलाई खुशी पार्न ‘समाजवाद’ हटाउनैपर्ने काँग्रेस बैठकमा प्रस्ताव

नेपाली काँग्रेसको व्यवहारमा जे भएपनि मूल आदर्शका रुपमा रहेको समाजवाद शब्द हटाउनुपर्ने माग औपचारिक रुपमा उठाइएको छ । पार्टी मुख्यालय, सानेपामा भइरहेको केन्द्रीय समिति बैठकमा संसदीय दलका प्रमुख सचेतक तथा केन्द्रीय सदस्य श्याम घिमिरेले ‘समाजवाद’ शब्द हटाउनुपर्ने प्रस्ताव गरेका छन् ।

उनले कम्युनिष्ट र काँग्रेसबीच भिन्नता देखाउन ‘समाजवाद’ शब्दलाई पार्टीको सिद्धान्तबाट हटाउनुपर्ने बताएका छन् । नेपाली काँग्रेसले राष्ट्रियता, प्रजातन्त्र र समाजवादलाई मूल आदर्श मान्दै आएको छ । तर व्यवहारमा उदार अर्थतन्त्र र विश्वबजारीकरणलाई अंगीकार गरेकाले घिमिरले उक्त माग गरेका हुन् । 

घिमिरेले व्यावसायीहरुको मनोबल बढाउन पनि काँग्रेसले समाजवादलाई अघि सार्न नहुने तर्क गरेका छन् । आजको बैठकमा विवादास्पद व्यवसायी तथा केन्द्रीय सदस्य एवम् सांसद विनोद चौधरीले पनि घिमिरेको भाषा मिल्दो धारणा राखेका छन् ।