यता टिआरसी विधेयक, उता विश्वासको मत

प्रतिनिधिसभाको आजको बैठकमा बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०७९ माथि छलफल हुँदैछ । संसद भवन नयाँ बानेश्वरमा दिउँसो १ बजे बस्ने बैठकमा कानून, न्याय तथा संसदीय मामिलामन्त्री अजय कुमार चौरसियाले कानून, न्याय तथा मानव अधिकार समितिको प्रतिवेदन सहित उक्त प्रस्ताव प्रस्तुत गर्ने सम्भावित कार्यसूची छ । त्यसपछि सांसदहरुले विधेयकमाथि छलफल गर्नेछन् ।

उता, सुदूरपश्चिमका मुख्यमन्त्री कमलबहादुर शाहले आज प्रदेशसभाबाट विश्वासको मत लिन लागेका छन् । प्रदेश सभाको हिजोको बैठकमा सभामुख भीम भण्डारीले मुख्यमन्त्रीले आज विश्वासको मत लिने जानकारी गराएका थिए ।

आज दिउँसो ३ बजे बस्ने बैठकमा उनले विश्वासको मत लिने छन् । शाह नेकपा एमाले, नेपाली काँग्रेस र नागरिक उन्मुक्ति पार्टीको समर्थनमा शनिबार मुख्यमन्त्रीमा नियुक्त भएका हुन् । ५३ सदस्यीय सभामा बहुमतका लागि २७ सदस्य आवश्यक पर्छ । शाहको पक्षमा एमालेका ११, काँग्रेसका १८ र नाउपाको सात गरेर ३५ जना देखिएका छन् ।