संविधान दिवसको दिन राजधानीमा जनप्रदर्शन गर्ने बहुमतको निर्णय

नेपाल कम्युनिष्ट पार्टी (बहुमत) ले भ्रष्टाचार मुद्दामा पाँच वर्षे हदम्यादको व्यवस्था खारेजीको माग गरेको छ । पार्टी महासचिव धर्मेन्द्र बास्तोला ‘कञ्चन’ ले १० बुँदे माग प्रस्तुत गर्दै त्यस्तो माग गरेका हुन् । 

उनले मन्त्रिपरिषद्ले नीतिगत निर्णय गरी भ्रष्टाचारमा अख्तियार नलाग्ने प्रावधान पनि खारेज गर्नुपर्ने माग राखेका छन् । त्यस्तै, सबै खाले भ्रष्टाचार बन्द गर्न, भ्रष्टाचारमा मुछिने न्यायाधीशहरुलाई पनि अख्तियारको छानबिनमा ल्याउने, भ्रष्टाचार गरी विदेशमा राखिएको सम्पूर्ण सम्पत्ति स्वदेश फर्काउने व्यवस्था मिलाउन पनि भनिएको छ । 

पार्टीले अहिलेसम्मका सम्पूर्ण उच्च पदस्थहरुको सम्पत्ति छानबिन गरी भ्रष्टाचार गरिएको सम्पत्ति राष्ट्रियकरण गर्नुपर्ने समेत माग राखेको छ । आफ्ना मागहरु सम्बोधन नभएमा भदौ १४ गतेदेखि संघर्षका कार्यक्रम गर्ने चेतावनी दिइएको छ । 

संघर्षका कार्यक्रमअन्तर्गत शुक्रबार मुलुकभरका जिल्लामा कोणसभा गरी शनिबार प्रत्येक प्रदेश राजधानीमा भ्रष्टाचार काण्डबारे सार्वजनिक गर्ने जनाइएको छ । यस्तै, भदौ १६ गतेदेखि १९ गतेसम्म ७७ वटै जिल्लामा भ्रष्टाचारका घटनाबारे जानकारी गराउने पार्टीले बताएको छ । 

भदौ २० गते देशभर भ्रष्टाचार र वित्तिय शोषणविरुद्ध मसाल जुलुस निकाल्ने, २५ गते भ्रष्टाचारविरुद्ध जनसंघर्ष समिति घोषणा गर्ने, २६ गतेदेखि ३१ गतेसम्म महानगर, उपमहानगर र नगरपालिका तथा गाउँपालिकामा बेरुजुको विवरण सार्वजनिक गर्न दबाब सिर्जना गर्ने र असोज ३ गते काठमाडौंमा जनप्रदर्शन गर्ने कार्यक्रम छ ।