कहाँको गिरिबन्धु, कहाँको लोकबन्धु

भाषण भ्रष्टाचारविरोधी गरे पनि पूर्वप्रधानमन्त्री पुष्पकमल दाहालले गिरिबन्धु टि इस्टेटको जग्गा प्रकरणमा सरेण्डर गरेको भनी आलोचित वामपन्थी नेता लोकबन्धु कन्दङ्वालाई रातो कार्पेट ओछ्याएर स्वागत गरेका छन् । कन्दङ्वाले गिरिबन्धुको ५१ बिघा जमिन राज्यको हुनुपर्छ भन्दै मुद्दा हालेका थिए ।

सर्वोच्च अदालतसम्म मुद्दा पुगेपछि उनले उक्त मुद्दा मिलापत्रमा टुङ्ग्याएको आरोप लाग्दै आएको छ । यसनिम्ति नेकपा (माले)का नेता सिपी मैनालीका भाइ मीनप्रकाश र विष्णु राईलगायतको अफर स्वीकारेको दावी स्रोतको छ । वादीपक्ष आफैँले मुद्दा फिर्ता लिने भएपछि गिरिबन्धुको जमिन बेच्न सहज भएको चर्चा चलेको थियो ।

विडम्वना नै भन्नु पर्छ, प्रचण्डले गिरिबन्धुको जग्गा प्रकरणकै कारण तस्करहरू मिलेर आफ्नो सरकार ढालेको, सत्ता गुमाउनु परेको दाबी गर्न छाडेका छैनन् । त्यसै प्रकरणमा मुछिएका कन्दङ्वालाई माओवादी केन्द्रमा प्रवेश गराएपछि झापालीहरू छक्क परेका हुन् ।

उनी २०३५/३६ सालतिर एमाले अखिलका केन्द्रीय नेता थिए । माधवकुमार नेपाल नेतृत्वको नेकपा (एकीकृत समाजवादी)मा पनि रहे । पछिल्लो समय राजनीतिमा निष्क्रिय देखिएका उनीसहित केही भर्खरै माओवादीमा प्रवेश गरेका छन् ।

(साभार:जनआस्था साप्ताहिकबाट)