प्रहरीले रित्तो हात फर्काएपछि काठमाडौंका मेयरको दुःखेसो

पशुपतिको धर्मशाला खालि गराउन गएको काठमाडौं महानगर प्रहरीको टोली रित्तो हात फर्किएपछि मेयर बालेन्द्र (बालेन) साहले कवितामार्फत् दुःखेसो पोखेका छन् । 

धर्मशाला खालि गराउन गएको महानगर प्रहरी टोलीलाई नेपाल प्रहरीले रोकेकोप्रति इंगित गर्दै मेयर बालेनले सामाजिक सञ्जाल फेसबुकमा भावुक कविता पोष्ट गरेका हुन् । हिन्दुराष्ट्र संविधानमा नभई स्वाभिमानमा देखिनुपर्ने उनको कवितामा धर्मशाला खालि गराउन सरकारले सहयोग नगरेको आसय व्यक्त गरिएको छ ।  

यस्तो छ बालेनको कविता :

गाउँ मासेर बनेको शहरको के काम ?
आफ्नो ठाउँ नै नरहे पछि,
नाउँ बेचेर बनेको रहरको के काम ?

आफ्नो भाउ नै नभए पछि,
मलाई बुद्ध बोलीमा हैन,

ज्ञानमा चाहिन्छ ।
हिन्दु राष्ट्र संविधानमा हैन,
स्वाभिमानमा चाहिन्छ 

पशुपति क्षेत्र विकास कोषबाट धर्मशाला व्यवस्थापन जिम्मेवारी काठमाडौँ महानगरपालिकाले पाएपनि मारवाडी सेवा समितिले अवरोध गर्दै आएको छ । असोज २३ गते धर्मशाला खालि गराउन पुगेको महानगर प्रहरी टोलीलाई मारवाडी समुदायले रोकेको थियो । अवरोधबीच धर्मशालाबाट मारवाडी सेवा समितिको बोर्ड हटाएर महानगरले बोर्ड झुण्डायो ।

धर्मशालाबाट सामान हटाउन पुगेको महानगर प्रहरीलाई हिजो पनि मारवाडीहरुले अवरोध गरेका थिए । त्यसपछि महानगरले जिल्ला प्रशासन कार्यालय काठमाडौंलाई पत्र लेख्दै शान्ति सुरक्षा उपलब्ध गराइदिन आग्रह गरेको थियो । तर, स्थानीय प्रशासनले सहयोग नगर्दा आज पनि धर्मशाला खालि हुन नसकेको महानगरको दाबी छ । 

पशुपति क्षेत्र विकास कोषसँग सम्झौता गरेर मारवाडी सेवा समितिले सस्तो भाडादरमा धर्मशालाको ९ रोपनी ९ आना दुई पैसा जग्गा २१ वर्षदेखि भोगचलन गर्दै आएको थियो । २०८० साउन १७ गते कोषले उक्त सम्झौता खारेज गरेपछि विवाद शुरु भएको हो ।

त्यसविरुद्ध मारवाडीहरुले काठमाडौँ जिल्ला अदालतमा रिटसमेत हालेका थिए । तर, सम्झौता खारेजीको निर्णय अदालतले सदर गरेपछि पनि मारवाडीहरुले धर्मशाला छाड्न मानेका छैनन् ।

यता, मारवाडी सेवा समितिले हडपेको धर्मशालाको जग्गा जसरी पनि आफ्नो जिम्मामा ल्याउने अडानमा रहेका बालेनले यसअघि पनि सरकारले सहयोग नगरेको गुनासो गरेका थिए । नाजायज सम्बन्धबाट सम्झौता गरि धर्मशालाको नाममा जग्गा कब्जा गरेका मारवाडीहरुलाई सरकारले उल्टै संरक्षण गरेको उनको दाबी छ । 

‘आफ्नो जिम्मेवारीमा आएको संरचनालाई संरक्षण र व्यवस्थापन गर्न महानगर प्रहरी पुग्छ । तर, अदालतको फैसला, कोषको निर्णय सबै लत्याएर मारवाडी सेवा समिति प्रतिकारमा उत्रिन्छ । नेपाल प्रहरीले महानगरलाई हस्तक्षेप गरेर उल्टो मारवाडी सेवा समितिको संरक्षण गर्छ’, मेयर बालेनले भनेका छन्, ‘अब बुझ्नु, देश चलेको त यस्तै समितिबाट पो रहेछ । यस्ता समितिहरूको नाजायज सम्बन्धहरू नियम र अदालत भन्दा माथि रहेछन् । हामी चाहिँ प्रहरी र सरकारले देश चलाएको भन्दै भ्रममा रहेछौँ ।’