टेलिफोन संवाद सार्वजनिक गर्नेसङ्ग रास्वपा आगो

राष्ट्रिय स्वतन्त्र पार्टी (रास्वपा) का उपसभापति डोलप्रसाद उर्फ डिपी अर्यालले आफ्नो निजी टेलिफोन संवाद सार्वजनिक गर्नेविरुद्ध कानुनी उपचारमा जाने चेतावनी दिएका छन् । प्रधानमन्त्री,मन्त्री र विभिन्न दलका नेतासँग गरेको भेटघाटलाई लिएर विभिन्न सञ्चारमाध्यम र सामाजिक सञ्जालमा भइरहेको टिकाटिप्पणीप्रति ध्यानाकर्षण भएको उल्लेख गर्दै उनले कानुनी कारबाहीमा जाने चेतावनी दिएका हुन् । 

सामाजिक सञ्जालमा एउटा स्ट्याट्स लेख्दै उनले गलत मनशायले टेलिफोन संवाद सार्वजनिक गरेर आफ्नो वैयक्तिक गोपनीयतामाथि दख्खल पुर्याएको बताएका छन् । उनले लेखेका छन्,‘मैले मेरो निजी टेलिफोनबाट कोसँग,के–के संवाद गरेँ र गर्दै छु भन्ने सूचना प्राप्ति गर्नको लागि नियतवश नियोजित ढंगले गैरकानुनी र अनाधिकृत रुपले मेरो अनुमति र स्वीकृतिबेगर जासुसी तरिकाले बदनियतका साथ वैयक्तिक गोपनीयतामाथि दख्खल पुर्याएको हुँदा निजलाई कानुनबमोजिम कारबाही गरियोस् । कानुनी प्रक्रियामा जाने नै छु ।’

‘सभापतिको अनुपस्थितिमा पार्टीको नियमित काम गर्नु र राजनीतिक मुद्दामा सरकार र विभिन्न दलका नेतासँग छलफल गर्नु हाम्रो जिम्मेवारी नै हो ।"

सभापति रवि लामिछानेको अनुपस्थितिमा पार्टीको नियमित काम गर्नु र राजनीतिक दलका नेतासँग छलफल गर्नु आफ्नो जिम्मेवारी भएको उनको जिकिर छ । आफ्नो जिम्मेवारी पुरा गर्दा एकपक्षीय ढंगबाट गलत मनशायले प्रचार गरिएको उनको भनाइ छ । 

‘राष्ट्रिय स्वतन्त्र पार्टीको सभापति रवि लामिछानेको पक्राउ आवश्यक थियो वा त्यो राजनीतिक प्रतिशोधपूर्ण कदम थियो ? यो बहसको विषय बनिरहँदा सभापति कानुनी लडाइँमा हुनुहुन्छ । र उहाँले कानुनी प्रक्रियाबाटै न्याय पाउनेमा हामी विश्वस्त छौं’,उनले भनेका छन्,‘सभापतिको अनुपस्थितिमा पार्टीको नियमित काम गर्नु र राजनीतिक मुद्दामा सरकार र विभिन्न दलका नेतासँग छलफल गर्नु हाम्रो जिम्मेवारी नै हो । जिम्मेवारी पुरा गर्दा एक पक्षीय ढंगबाट गलत मनशायका साथ गरिएको प्रचारप्रति दुःखित छु ।’

गत कात्तिक २ गते पार्टी कार्यालयबाटै समातिएका सभापतिको पक्षमा रास्वपाका नेता–कार्यकर्ताले निरन्तर प्रदर्शन गरिरहेका छन् । सोही क्रममा अर्याल र प्रमुख सचेतक सन्तोष परियारले बालुवाटार पुगेर प्रधानमन्त्री केपी शर्मा ओलीसँग गोप्य वार्ता र काङ्ग्रेस सभापति शेरबहादुर देउवा पत्नी तथा परराष्ट्र मन्त्री आरजू राणासङ्ग भेट्न समय मागेका थिए । उनीहरुले लुसुक्क प्रधानमन्त्री भेटेपछि रास्वपाभित्रै खैलाबैला मच्चिएको छ ।