रुख चढेर क्रिकेट हेर्नेलाई प्रहरीले गरायो सचेत

नेपाल प्रहरीले सभ्य, मर्यादित र सुरक्षित भएर क्रिकेट हेर्न आग्रह गरेको छ । कीर्तिपुरस्थित त्रिवि क्रिकेट मैदानमा जारी नेपाल प्रिमियर लिग (एनपीएल) हेर्न जाने दर्शकलाई प्रहरीले यस्तो अनुरोध गरेको हो । 

सीमित सिटका कारण दर्शकहरुले अग्ला रुख चढेर र जोखिमपूर्ण स्थानबाट क्रिकेट हेर्ने गरेका छन् । त्यस्ता गतिविधिले ठूलो दुर्घटना हुनुका साथै ज्यान नै जोखिममा पर्नसक्ने भन्दै प्रहरीले सचेत गराएको छ । 

आज जारी सूचनामा भनिएको छ,‘हाल टियु ग्राउण्डमा चलिरहेको नेपाल प्रिमियर लिगको खेलमा दर्शकहरु विभिन्न अग्ला रुख तथा अन्य जोखिमयुक्त स्थानबाट क्रिकेट हेर्ने गरेको र यस्ता खालका गतिविधिले ठूलो दुर्घटना निम्त्याउने तथा ज्यान जोखिमसमेत हुने हुँदा सम्पूर्ण दर्शकहरुमा सभ्य, मर्यादित तथा सुरक्षित तवरले खेल हेर्न हुन अनुरोध गर्दर्छौं ।’