बंगलादेश जाने भारतीयको ब्यागेजमा दुई वटा पेस्तोल

काठमाडौंबाट बंगलादेशको राजधानी ढाका जान लागेका एक जना भारतीय नागरिकको ब्यागेजबाट दुई वटा पेस्तोल फेला परेको छ । राहदानी नम्बर डब्लु ९३००९८२ नम्बरको राहदानी बोकेका मोहम्मद निजामुद्दिनको साथबाट हतियार फेला परेको सशस्त्र प्रहरी स्रोतले बतायो ।

हिमालय एअरलाइन्सको उडान नम्बर एच ९०६७८ मा जान लागेका उनले एअरसफ्ट बन्दुक जस्तै पेस्तोल लैजान खोजेका थिए । विमानस्थलमा पेस्तोल फेला परेपछि उनले १४ वर्षे छोरोलाई खेल्न खेलौना पेस्तोल किनेको उनको जिकिर छ । 

श्रीमती र छोरासहित ढाका जान लागेका उनले उक्त हतियार भारतमा किनेको बताएका छन् । खेलौना हतियार भनिए पनि उनलाई थप अनुसन्धानका लागि महानगरीय प्रहरी वृत्त गौशालामा राखेर सोधपुछ थालिएको बुझिएको छ ।