बुद्धले यस्तरी राज्यको ढुकुटी बिगार्दै

केपी शर्मा ओलीको दोस्रो कार्यकालका तत्कालीन अर्थमन्त्री डा. युवराज खतिवडाले अरुलाई पत्तो नै नदिई बुद्ध एअरका वीरेन्द्र बस्नेतलाई अरबौं पोसेको पाइएको छ । राज्यको कोष र जनताको गाँस खोसेर बुद्धका मालिकलाई पोस्ने सुविधालाई माओवादी नेता जनार्दन शर्माले पनि निरन्तरता दिएको र त्यो आजका मितिसम्म कायम रहेको आयल निगमका प्रबन्ध निर्देशक चण्डिकाप्रसाद भट्टले बताए ।

आर्थिक वर्ष ०७६ / ७७ को बजेट वक्तव्यमा खतिवडाले वीरेन्द्रको रोडम्यापअनुसार अनौठो ‘कर छुट’ घोषणा गरेका थिए । २०७७ साउनदेखि नेपालका विमान सेवाप्रदायक कम्पनीलाई हवाई इन्धन खरिद गर्दा पूर्वाधार विकास करबापत प्रतिलिटर १० रुपैयाँ छुट दिइएको हो । कोरोना महामारीका कारण घाटामा गएको वीरेन्द्रको गुनासोका आधारमा खतिवडाले उक्त सुविधा दिएका थिए । जुन कोभिड सकिएको वर्षौँ बित्दा पनि जारी छ ।

त्यसपछि विमान कम्पनीहरू नाफामा गए पनि एकचोटिलाई दिइएको खाइपाइ सुविधा भनेर हटाउने प्रयास कसैले गरेनन् । जबकि त्यसरी घाटामा गएका भनिएका बुद्ध र यतिबीच अहिले विमान किन्ने होडबाजी छ । नेपाल आयल निगमका अनुसार, आन्तरिक उडानका निम्ति भारतबाट ट्रकका ट्रक ओसारेर दैनिक सरदर साढे तीन लाख लिटर हवाई इन्धन बिक्री हुँदै आएको छ । त्यसमा बुद्धले ६० प्रतिशत, यतिले ३० र अन्य कम्पनीले १० प्रतिशत प्रयोग गरेको देखिन्छ ।

यो हिसाबले सरदर दैनिक ३५ लाख रुपैयाँ विमान सेवाप्रदायक कम्पनीले चोखै छुट पाएका छन् । त्यसको ६० प्रतिशत छुट्याउँदा बुद्धले दैनिक औसत २१ लाख, मासिक ६ करोड ३० लाख र वार्षिक ७५ करोड ६० लाख रुपैयाँ फोकटमा पाएको देखिन्छ । यस हिसाबले पछिल्लो पाँच वर्ष उसले कम्तीमा तीन अर्ब ७८ करोड रुपैयाँ सरकारी कोषबाट हात पारेको प्रष्ट हुन्छ । 

बुद्धसँग भएको एटिआर ७२ सिरिजको विमान नयाँ किन्दा हालको बजार मूल्य तीन अर्ब ६१ करोड नेपाली रुपैयाँ पर्न आउँछ । युवराज खतिवडा र जनार्दन शर्माले चोर बाटोबाट पोसेका कारण यसबीच बुद्धले एउटा एटिआर नयाँ विमान यही छुट सुविधाअन्तर्गत सित्तैमा हात पारेको सहजै हिसाब निकाल्न सकिन्छ । जबकि कोरोनाको कारण घाटामा गएको भनिएका बुद्ध एअरलगायत कम्पनीले सोही बेला चार्टर्ड उडानका नाममा चार गुणासम्म बढी भाडा लिएका थिए । उनै खतिवडा अहिले पनि प्रधानमन्त्रीको आर्थिक तथा विकास सल्लाहकार छन् ।

बुद्धले पछिल्लो समय एकै वर्ष तीन वटासम्म विमान खरिद गरेको पाइएको छ । तर, अरुको आँखामा छारो हाल्न ती खरिदमा उसले हिमालयन बैंकलगायतसँग कन्सोर्टियम कर्जा प्रयोग भएको कागजी हिसाब देखाएको छ । बुद्धले सामान्य अवस्थामा दैनिक एक सय ४० भन्दा बढी दुईतर्फी उडान भर्दै आएको नेपाल नागरिक उड्डयन प्राधिकरणका कर्मचारी बताउँछन् । अहिले भारतको बनारसतिर पनि उड्न थालेकाले हवाई इन्धनको खपत ह्वात्तै बढेको छ । औसतमा बुद्धले मात्रै दिनमा दुई लाख १० हजार, यतिले एक लाख पाँच हजार र अन्यले ३५ हजार लिटर इन्धन खपत गर्छन् । 

खतिवडा र आफूबीच गोप्य साँठगाँठको समाचार बिग मिडिया हाउसमा प्रकाशन, प्रशारण हुनबाट रोक्न कान्तिपुरमा कार्यरत एक जना पत्रकारलाई वीरेन्द्रले प्रयोग गरेको आरोप छ । श्रीमती विनिता कर्णलाई म्यानेजर सरहको जागिर दिएपछि बुद्धको बदमासी ठूला भनिएका मिडियामा यसै रोकिएको अवस्था छ । त्यस्तै प्रकृतिको अर्को घटनाबारे बुद्धकै एक जना कर्मचारी भन्छन्, ‘एउटा अनलाइन न्युज पोर्टलमा ढुंगाना थरका प्रकाशकका दाइ हाम्रै कम्पनीमा काम गर्थे । पछि पोखरा स्टेसनतिर पदोन्नतिमा कुरा नमिलेपछि राजीनामा दिए । केही समय भाइको अनलाइनमा वीरेन्द्रको बदमासीका समाचार धेरै सिरिजमा आयो । एक दिनको गोप्य भेटपछि त्यस्ता समाचार ठ्याक्कै रोकिए।’

खतिवडाले आफ्नो प्रस्तावअनुसार कर छुट दिएपछि वीरेन्द्रले धन्यवाद दिएका थिए । त्यतिबेला बस्नेतको भनाइ थियो, ‘यो कर हट्दा अब नेपालमा सबै मध्यमवर्गीयको पहुँचमा हवाई सेवा पुग्ने निश्चित छ । अर्थमन्त्री र अर्थसचिव यसनिम्ति धन्यवादको पात्र हुनुहुन्छ।’

उता, प्रहरीबाट अवकाशपछि राजनीतिमा लागेका एसएसपी रमेश खरेलसँग वीरेन्द्रको सम्बन्ध पनि बिचित्रको रहेको बस्नेत निकटस्थहरू बताउँछन् । झण्डै डेढ दशकअघि खरेल हनुमानढोका प्रहरी कार्यालयमा पहिले डिएसपी र पछि एसपी थिए । वीरेन्द्रका भाइ शिवेन्द्रले शिवानी एअर (पाइलट ट्रेनिङ स्कूल) का विद्यार्थीहरूलाई ठगेको उजुरी पर्‍यो।

शिवेन्द्रलाई रातारात अमेरिका भगाइयो तर चेयरमेनको रुपमा रहेकी भारतीय महिला समातिइन् । त्यो खबरलाई ९९ प्रतिशत मूलधारका मिडियामा रोकाइयो । तर पुष्करलाल श्रेष्ठको नेपाल समाचारपत्रले मात्रै ठगी, गिरफ्तारी र अमेरिका पलायनको समाचार प्रकाशन गरेको थियो । एसपीको सदाशयताले बस्नेत परिवारको बेइज्जती रोकिएको भन्दै वीरेन्द्रले खरेललाई बाराबाट ०७९ मा चुनाव लड्दा राम्रै सहयोग गरेको स्रोतको दाबी छ ।