शीर्ष तीन नेताले सन्यास लिए गगन थापा रमाउने

नेपाली कांग्रेसका महामन्त्री गगनकुमार थापाले प्रमुख तीन दलका शीर्ष नेताहरूले राजनीतिबाट सन्न्यास लिए आफू सबैभन्दा बढी खुसी हुने बताएका छन् ।  

प्रधानमन्त्री तथा एमाले अध्यक्ष केपी शर्मा ओली, पूर्व प्रधानमन्त्रीद्वय नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डले राजनीतिबाट बिश्राम लिनुपर्ने धारणा उनले राखेका हुन् । यद्यपि तीन नेताले राजनीतिमा खेलेको भूमिका र योगदानको आफूले अवमूल्यन गर्न नखोजेको थापाले प्रष्टिकरण पनि दिए । 

‘नेपाली कांग्रेसका सभापति शेरबहादुर देउवा, एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डले आजको दिनबाट नेपाली राजनीतिबाट हामी सन्यास लिन्छौं भनेर भन्नुभयो भने म सबैभन्दा खुसी मानिस हुन्थेँ,’ उनले भने, ‘अवमूल्यन गरेर भनेको होइन एकदमै ठूलो सम्मान छ उहाँहरूप्रति । उहाँहरूले नेपालमा ठूलो योगदान गर्नुभएको छ ।’

राजनीतिक दलका शीर्ष नेतृत्वसँगको युवाहरूमा वितृष्णा बढेको छ भन्ने प्रशंगमा थापाले यस्तो कुरा गरेका हुन् । उनले मुलुकको राजनीति डेलिभरी गर्न नसक्ने ठाउँमा गएर अड्केको पनि बताए ।

‘अहिले नेपाली राजनीतिप्रति वितृष्णा छ । यसको कारण भनेको नेपालको राजनीति फोहोर जमेको पोखरी जस्तो भएको छ,’ उनले भने ।