एमालेमा पुर्नगठनको दबाब, अष्टलक्ष्मीलाई अघि सार्ने चर्चा
नेकपा (एमाले)का पोलिटब्युरो सदस्य गोकुलप्रसाद बाँस्कोटाले राजनीतिक दलबिना गणतन्त्रको आयु लामो नहुने भन्दै तत्काल पार्टी पुर्नगठनको माग गरेका छन् ।
अहिलको परिस्थिति आउनुको कारणबारे गम्भीर रुपमा समीक्षा गरेर अघि बढ्नुपर्ने उनको मत छ । बाँस्कोटाले आज सामाजिक सञ्जालबाट आफ्नो धारणा राख्दै गणतन्त्रबिना समाज थप बिथोलिनेतर्फ पार्टीपंतिलाई सचेत गराएका छन् ।
‘अरु क्षति रोक्न जे भो-भो हैन, किन भो-कसरी भो र अब के-कसरी, कहिले गर्ने, छिटो तर सुविचारित निर्णय गरी पार्टीलाई पुर्नगठन गरौँ’, उनले लेखेका छन्,‘अप्रिय लाग्ला तर सत्य यही हो कि दलबिना गणतन्त्र बाँच्दैन र गणतन्त्रबिना समाज ।’
समय र परिवेशअनुसार नेतृत्व परिवर्तन अनिवार्य रहेको भन्दै उनले यसतर्फ ध्यान दिन अन्य दललाई समेत सुझाव दिएका छन् । ‘समय, परिवेश, प्रकृति, प्रकृया र समाज विज्ञानका नियमले नेतृत्व बदल्छ सबै तयार हुनैपर्छ, बाँस्कोटा भन्छन् ।’
एमालेका केही नेताले उपाध्यक्ष अष्टलक्ष्मी शाक्यको नेतृत्वमा पार्टी पुर्नगठन गर्नुपर्ने आवाज उठाउन थालेको पाइन्छ । विघटित प्रतिनिधिसभा सदस्यसमेत रहेका करिब एक दर्जन नेताले हिजो शाक्यलाई भेटेर नेतृत्व लिन आग्रह गरेको बुझिएको छ ।
भेटमा सहभागी एक नेता भन्छन्, ‘उहाँ निर्विवाद, निश्कलंक हुनुहुन्छ, हामीले भेटेर अबको नेतृत्व तपाईले लिनुस् भनेका छौँ, छलफल भइरहेको छ, चाँडै टुंगोमा पुग्छौँ ।’
टिप्पणीहरू