महानगरको डोजर आज खेलकुद मैदानमा

काठमाडौंको सानो गौचरणस्थित खेलकुद मैदानभित्र बनाइएको अवैध संरचना काठमाडौँ महानगरपालिकाले भत्काएको छ । 

जिल्ला खेलकुद विकास समितिले बनाएको संरचनामाथि महानगर प्रहरी बलको टोलीले आज दिउँसो डोजर चलाएको हो । वडा नम्बर–५ स्थित सो मैदानको जग्गामा १७ वटा सटर बनाएर खेलकुद समितिले भाडामा लगाएको छ । 

सटर खाली गर्न पटकपटक निर्देशन दिँदासमेत अटेर गरेपछि बाध्य भएर संरचना भत्काउनुपरेको महानगरले जनाएको छ । अवैध संरचना हटाउने अभियानअन्तर्गत आज सांकेतिकरूपमा सटर हटाएको नगरप्रहरी निरीक्षक प्रकाश पण्डितले बताए । 

भोलिदेखि निरन्तर भत्काइने जानकारी दिँदै उनले जनआस्थासँग भने,‘आज सांकेतिक रुपमा भत्काएका छौं । उहाँहरूले सामान सार्न समय माग्नुभएकाले भोलि बिहानसम्मको समय दिएका छौं । भोलिदेखि लगातार भत्काउँछौ । एक हप्तामा सकिन्छ होला !’

उनका अनुसार त्यो जग्गा सरकारको हो । सो जग्गामा महानगरले १७ करोड रुपैयाँ लागतमा फुटबल मैदान निर्माण गरिरहेको छ । शुभ कन्स्ट्रक्सन प्रालिले ठेक्का पाएकोमा प्याराफिट निर्माण गरिसकिएको छ ।