कोही पूर्व प्रधानमन्त्री शीतल निवास, कोही बालुवाटार

हिजो दिउँसो तीन जना पूर्व प्रधानमन्त्री बालुवाटार छिर्दा दुई जना पूर्व प्रधानमन्त्री बिहान शीतल निवास पुगेका छन् । दुबैतिरको भेटवार्तामा आगामी निर्वाचन र मुलुकको अवस्थाबारे छलफल भएको बुझिएको छ ।

बालुवाटारमा प्रधानमन्त्री सुशीला कार्कीले काँग्रेस सभापति शेरबहादुर देउवा, एमाले अध्यक्ष केपी शर्मा ओली, नेकपा संयोजक पुष्पकमल दाहाल प्रचण्डसँग भेटवार्ता गर्नुभएको थियो । त्यसअघि बिहान शीतल निवासमा राष्ट्रपति रामचन्द्र पौडेलसँग पूर्व प्रधानमन्त्री तथा नेकपा सह संयोजक माधवकुमार नेपाल र झलनाथ खनालले चुनावकेन्द्रित भेटवार्ता गर्नुभयो ।

राष्ट्रपति पौडेल तोकिएको मितिमा चुनाव हुनैपर्नेमा रहनुभएको नेता नेपाल निकटस्थ स्रोतले बतायो । राष्ट्रपतिको भनाइ थियो, ‘निर्वाचनले सबैलाई एउटा लिकमा ल्याउँछ । यसका लागि सबै दलबीच साझा समझदारी हुनैपर्छ । मुलुकमा कुनै संकट आउन दिन हुँदैन ।’

यता प्रतिनिधिसभा पुनर्स्थापना हुने वा नहुने भन्ने आकलन चलेको बेला चुनावका लागि भारतले गाडीहरु उपलब्ध गराउन लागेको छ । उता अदालत स्रोतले प्रतिनिधि सभा पुनर्स्थापना हुने सम्भावना न्यून रहेको बतायो  ।

तर, राजनीतिक विश्लेषकहरु फागुन २१ गते चुनाव नहुने अवस्था उत्पन्न भएमा परिस्थिति अर्कै पनि हुनसक्ने आकलन गर्छन् । ‘एकाध दिनका लागि भए चुनाव परसर्न सक्ला । तर धेरै समयका लागि हो भने त्यतिबेला संसद पुनस्र्थापनाको विकल्प हुँदैन,’ काँग्रेसका एकजना नेताले भने ।