पचास लाख म्यासेज पठाउने राजावादी पक्राउ

प्रविधिको दुरुपयोग गरी एसएमएसमार्फत् लाखाैँ नागरिकलाई बालुवाटार बोलाउने राजावादी अभियन्ता निर्देश सेढाईँ पक्राउ परेका छन् । 

चितवन घर भएका उनलाई प्रहरीले गएराती हात्तिसारबाट नियन्त्रणमा लिएको हो । सेढाईँले केही दिनअघि नेपाल टेलिकमको गेटवेमार्फत् पुष ३० गते दिउँसो १२ बजे बालुवाटारमा उपस्थित हुन आग्रह गर्दै ५० लाख एसएमएस पठाएका थिए । 

‘नेपालका सबै समस्याहरूको सँधैका लागी मुक्तिको निम्ति प्रदेश संरचना हटाई प्रत्यक्ष निर्वाचित संरचनासहितको सनातन संवैधानिक राजसंस्था स्थापनाको लागि निमन्त्रणा गर्न चाहन्छु’ भन्ने व्यहोराको मेसेज पठाएका उनले साे दिन बालुवाटारस्थित प्रधानमन्त्री कार्यालय घेराउ गर्ने याेजना बनाएकाे खुलेको छ । 

‘एट अलर्ट’ भन्दै आएको उक्त मेसेज देखेपछि कतिपय एनटिसी प्रयोगकर्ताले प्रहरीलाई खबर गरेका थिए । प्रहरीले दुई दिनको अनुसन्धानपछि सेढाईँले नेपाल टेलिकमको गेटवे दुरुपयोग गरेर आफूखुशी एसएमएस पठाएको खुलेको हो । 

यद्यपि, उनले सर्वसाधारणको नम्बर भएको डाटा कहाँबाट प्राप्त गरे भन्ने खुलेको छैन । एक आईटी विज्ञका अनुसार त्यस प्रकारको डाटा गृह मन्त्रालय र वित्तीय बैंकहरुसँग मात्रै हुन्छ । सेढाईँले कसरी उक्त डाटा प्राप्त गरे भन्नेबारे अहिले अनुसन्धान भइरहेको प्रहरीले जनाएको छ ।