संक्रमणप्रति संवेदनशील बन्न स्वास्थ्य मन्त्रालयको अपिल

स्वास्थ्य तथा जनसंख्या मन्त्रालयले मुलुकको स्वास्थ्य प्रणालीले थेग्नै नसक्ने गरी संक्रमण बढेकाले स्वास्थ्य सुरक्षाका मापदण्डको पालन गर्न सर्वसाधारणलाई अपिल गरेको छ ।

शुक्रबार अपिल जारी गर्दै मन्त्रालयले जनस्वास्थ्यका मापदण्डको पालनमा संवेदनशील हुन भनेको हो । मन्त्रालयले २० जिल्लामा कोरोना संक्रमण डरलाग्दो गरी फैलिरहेको जनाएको छ ।

मोरङ, सुनसरी, झापा, पर्सा, बारा, धनुषा, काठमाडौं, भक्तपुर, ललितपुर, चितवन, मकवानपुर, काभ्रे, कास्की, दाङ, बाँके, रुपन्देही, पाल्पा, बर्दिया, कपिलवस्तु, सुर्खेत, कैलाली र कञ्चनपुरमा कोरोना संक्रमणदर तीब्र गतिमा बढ्दै गइरहेको मन्त्रालयले जनाएको छ ।

स्वास्थ्य प्रणालीले थेग्नै नसक्ने गरी संक्रमण बढेको उल्लेख गर्दै मन्त्रालयले अस्पतालमा राखेर हेरचाह गर्न अस्पतालको शैया उपलब्ध गराउन नसकिने अवस्थाको समेत जानकारी गराएको छ ।