चुनाव दैलोमै छिरेपछि ट्याङ्की बाँड्दै ‘कमरेड सनकबहादुर’

काँग्रेस प्रतिनिधि दीपेन्द्रबहादुर डाँगीले वीरबहादुर केसी उर्फ ‘कमरेड सनकबहादुर’ लाई २०७४ सालतिर साडी बाँडेर चुनाव जितेको आरोप लगाउँदै आएका छन् ।

गंगादेव गाउँपालिका रोल्पाका अध्यक्ष वीरबहादुरलाई काँग्रेस प्रतिनिधि डाँगीले साडी बाँडेर चुनाव जितेको ‘बात’ लगाइरहँदा यसपटक अर्को आरोप थपिएको छ-‘कमरेड सनकबहादुर’ ले आउँदो चुनाव जित्न ट्याङ्की बाँडे ।

खल्तीमा दुइटा नागरिकता बोकेर स्थानीय सरकार हाँकिरहेका केसी स्थानीयस्तरमा कमरेड सनकबहादुरको उपनामले चिनिन्छन् । तिनै केसीले अर्काे चुनावलाई जोड घटाउ गरेर कपडा,ट्याङ्की, स्याउका बिरुवा, खसी बोका र चामलका बोरा बाँड्न थालेको एमाले–कांग्रेस कार्यकर्ताहरूको आरोप छ ।

अदुवा पकेट क्षेत्रका उपभोक्तालाई गंगादेव गाउँपालिका कृषि विकास शाखाको आर्थिक सहयोग र शीतल बस्ती अदुवा पकेट केन्द्र गंगादेव–५ स्याला रोल्पाको आयोजनामा हिल ट्याङ्की वितरण गरिएको प्रेस संयोजक कमरेड ‘परिवर्तन’ ले सामाजिक सञ्जालमार्फत जानकारी दिएका छन् ।

त्यसक्षेत्रका मतदाताले व्यापक गुनासो गरेपछि चुनावलाई लक्षित गरेर गाउँपालिका अध्यक्ष केसीको निर्देशन र वडाअध्यक्ष मानबहादुर डाँगीको उपस्थितिमा ४५ घरधुरीलाई एक–एकवटा सिचाईं ट्याङ्की बाँडिएको गाउँपालिकाका एक जना कर्मचारीले बताएका छन् ।