पछिल्लो समय धेरै वटा सहकारीबारे अनेक प्रश्न उठेका छन् । केहीले बचतकर्ताको रकममाथि खेलबाड गरेका छन् । सोही क्रममा पुतलीसडकस्थित सिन्सियर सेभिङ एण्ड क्रेडिट को–अपरेटिभ लिमिटेडबारे केहीले अनौठो जिज्ञासा राखेका छन् ।
दुई हजार जना बचतकर्ताको रकम लगानी गरिएको यस संस्थाले आफ्ना सेयर सदस्यलाई गुणतस्तरीय सेवा प्रदान गर्दै आएको बताइन्छ । न्युरोड, असन, भोटाहिटी, इन्द्रचोक, ढल्कु, नरदेवी, पुतलीसडक, मैतीदेवी, क्षेत्रपाटी, डिल्लीबजारलगायत क्षेत्रका धेरै बासिन्दा र व्यापारीले सिन्सियरमा बचत गरेका हुन् ।
काठमाडौं र ललितपुर कार्य क्षेत्र रहेको सिन्सियर सहकारीका सञ्चालक र प्रायः जसो कर्मचारी काठमाडौंका रैथाने बासिन्दा हुन् । सहकारी ऐनबमोजिम १६ प्रतिशतभन्दा बढी ब्याजदरमा कर्जा लगानी गर्न पाईंदैन ।
तर, सिन्सियरले बढी ब्याजदरमा कर्जा लगानी गरेको केही ऋणीहरुको भनाइ छ । यसबारे सहकारी कर्जा उपसमितिका सदस्य रुद्र खड्काले उक्त आरोपलाई गलत भनेका छन् । जनआस्थासँगको कुराकानीमा खड्काले ‘सहकारीलाई प्राप्त निर्देशन सबै पालना गरिएको छ,’ बताए । उनका अनुसार हालसम्म खराब कर्जा एक प्रतिशतभन्दा कम रहेको छ ।
सहकारी संस्थाले कर्जा प्रदान गर्ने बेलामा मात्रै सेवाशुल्क लिन पाउने प्रावधान एकातिर छ । त्यो पनि सरकारले तोकेबमोजिमको प्रतिशतमा लिन पाइन्छ । केही सहकारीले भने कर्जा दिँदा र कर्जा चुक्ता हुने समयमा पनि ऋणीसँग मनलाग्दो प्रतिशत तोकेर सेवाशुल्क लिने गरेको पाइएको छ । कतिपयले वर्षैपिच्छे कर्जा नवीकरण गर्न लगाउने गरिएको अन्य संस्थाका ऋणीहरुको दुःखेसो छ ।
सिन्सियर सहकारीका कार्यकारी सञ्चालक राजेश खड्काले आफ्नो सहकारीबारे उठाइएको प्रश्नमा कुनै दम नभएको जानकारी दिए । उनले भने, ‘इमान्दार र बदमासलाई एउटै डालोमा हालेर हेर्न भएन । सिन्सियरमाथि अहिलेसम्म कुनै दाग लागेको छैन । यो सबै अफवाह हो ।’
